ਕੋਰੋਨਾਵਾਇਰਸ ਦੀ ਮਹਾਮਾਰੀ ਕਾਰਣ ਬ੍ਰਿਟੇਨ ''ਚ ਵਧ ਰਹੀ ਹੈ ਗਰੀਬੀ

ਲੰਡਨ- ਮਾਹਰਾਂ ਮੁਤਾਬਕ ਕੋਰੋਨਾਵਾਇਰਸ ਕਾਰਣ ਬ੍ਰਿਟੇਨ ਵਿਚ ਗਰੀਬੀ ਵਧ ਰਹੀ ਹੈ, ਜਿਥੇ ਪਹਿਲਾਂ ਹੀ ਆਰਥਿਕ ਸੰਕਟ ਤੋਂ ਬਾਅਦ ਇਕ ਦਹਾਕੇ ਤੋਂ ਖਰਚ ਵਿਚ ਕੀਤੀ ਕਮੀ ਕਾਰਨ ਗਰੀਬੀ ਦਰ ਵਧੇਰੇ ਹੈ। ਅਧਿਕਾਰਿਤ ਅੰਕੜਿਆਂ ਮੁਤਾਬਕ ਕਰੀਬ ਇਕ ਕਰੋੜ 40 ਲੱਖ ਲੋਕ ਗਰੀਬੀ ਦੀ ਸ਼੍ਰੇਣੀ ਵਿਚ ਹਨ, ਜੋ ਦੇਸ਼ ਦੀ ਕੁਲ ਆਬਾਦੀ ਦਾ 25 ਫੀਸਦੀ ਹੈ। ਸਰਕਾਰੀ ਅੰਕੜਿਆਂ ਮੁਤਾਬਕ ਗਰੀਬਾਂ ਵਿਚ 42 ਲੱਖ ਬੱਚੇ ਹਨ।

ਮਾਹਰਾਂ ਨੇ ਦੱਸਿਆ ਕਿ ਇਸ ਨਾਲ ਹਾਲਾਤ ਹੋਰ ਖਰਾਬ ਹੋ ਸਕਦੇ ਹਨ ਕਿਉਂਕਿ ਲਾਕਡਾਊਨ ਦੇ ਕਾਰਨ ਵੱਡੀ ਗਿਣਤੀ ਵਿਚ ਲੋਕਾਂ ਦੀ ਨੌਕਰੀ ਜਾਵੇਗੀ। ਸਮਾਜਿਕ ਬਦਲਾਅ ਦੇ ਲਈ ਸਮਰਪਿਤ ਸੰਗਠਨ ਜੋਸੇਫ ਰਾਓਨਟ੍ਰੀ ਫਾਊਂਡੇਸ਼ਨ ਦੇ ਪ੍ਰਧਾਨ ਅਰਥਸ਼ਾਸਤਰੀ ਡੇਵ ਇਨਸ ਨੇ ਕਿਹਾ ਕਿ ਗਰੀਬੀ ਦਾ ਸਭ ਤੋਂ ਵਧੇਰੇ ਖਤਰਾ ਮਹਿਮਾਨ-ਨਵਾਜ਼ੀ ਤੇ ਖੁਦਰਾ ਬਾਜ਼ਾਰ ਵਿਚ ਕੰਮ ਕਰਨ ਵਾਲਿਆਂ 'ਤੇ ਹੋਵੇਗਾ, ਜਿਹਨਾਂ ਦੀ ਆਮਦਨ ਵਿਚ ਕਮੀ ਆ ਸਕਦੀ ਹੈ ਤੇ ਰੋਜ਼ਗਾਰ ਅਸੁਰੱਖਿਆ ਵਧੇਰੇ ਹੋਵੇਗੀ। ਜ਼ਿਕਰਯੋਗ ਹੈ ਕਿ ਪਿਛਲੇ 15 ਦਿਨਾਂ ਵਿਚ ਬੇਰੋਜ਼ਗਾਰੀ ਦੇ ਲਈ ਸਰਕਾਰ ਦੀ ਯੂਨੀਵਰਸਲ ਸਹਾਇਤਾ ਸਕੀਮ ਦੇ ਲਈ ਤਕਰੀਬਨ 10 ਲੱਖ ਲੋਕਾਂ ਨੇ ਆਪਲਾਈ ਕੀਤਾ ਹੈ, ਜੋ ਆਮ 15 ਦਿਨਾਂ ਦੇ ਮੁਕਾਬਲੇ 10 ਗੁਣਾ ਜ਼ਿਆਦਾ ਹੈ।

ਬ੍ਰਿਟੇਨ ਬਾਲ ਗਰੀਬੀ ਕਾਰਜ ਸਮੂਹ ਦੀ ਡਾਇਰੈਕਟਰ ਲੁਸੀਆ ਮੈਕਗੀਹਨ ਨੇ ਕਿਹਾ ਕਿ ਮਹਾਮਾਰੀ ਤੋਂ ਪਹਿਲਾਂ ਜੋ ਪਰਿਵਾਰ ਸਨਮਾਨਜਨਕ ਤਨਖਾਹ ਹਾਸਲ ਕਰਦੇ ਸਨ ਉਹ ਅਚਾਨਕ ਯੂਨੀਵਰਸਲ ਸਹਾਇਤਾ ਸਕੀਮ ਵੱਲ ਜਾ ਰਹੇ ਹਨ ਕਿਉਂਕਿ ਉਹ ਖੁਦ ਨੂੰ ਗਰੀਬ ਮਹਿਸੂਸ ਕਰ ਰਹੇ ਹਨ। ਉਹਨਾਂ ਕਿਹਾ ਕਿ ਆਰਥਿਕ ਰੂਪ ਨਾਲ ਉਹ ਸੰਭਾਵਿਤ ਵੱਡੀ ਮੰਦੀ ਵੱਲ ਜਾ ਰਹੇ ਹਨ ਤੇ ਇਸ ਤੋਂ ਜਲਦੀ ਉਭਰਨਾ ਬਹੁਤ ਮੁਸ਼ਕਲ ਹੈ। ਇਸ ਵਿਚਾਲੇ ਫੂਡ ਬੈਂਕ, ਜੋ ਸਭ ਤੋਂ ਅਸੁਰੱਖਿਅਤ ਲੋਕਾਂ ਨੂੰ ਖਾਣਾ ਖਵਾਉਂਦਾ ਹੈ, ਜਿਵੇ ਕਿ ਬੇਘਰ ਲੋਕਾਂ ਨੂੰ, ਉਸ ਨੂੰ ਕੋਰੋਨਾਵਾਇਰਸ ਮਹਾਮਾਰੀ ਦੇ ਕਾਰਨ ਬਹੁਤ ਘੱਟ ਦਾਨ ਮਿਲ ਰਿਹਾ ਹੈ। ਦ ਟਰੂਲਸ ਟਰੱਸਟ, ਜਿਸ ਦਾ ਬ੍ਰਿਟੇਨ ਵਿਚ 1200 ਫੂਡ ਬੈਂਕ ਦਾ ਨੈੱਟਵਰਕ ਹੈ, ਨੇ ਕਿਹਾ ਕਿ ਉਹ ਵੱਡੀ ਚੁਣੌਤੀ ਦਾ ਸਾਹਮਣਾ ਕਰ ਰਿਹਾ ਹੈ।