ਕੋਰੋਨਾ ਵਾਇਰਸ ਕਾਰਨ ਦੁਨੀਆ ''ਚ ਹੜਕੰਪ, ਆਸਟ੍ਰੇਲੀਆਈ ਸਿੱਖਾਂ ਨੇ ਸੰਭਾਲਿਆ ਮੋਰਚਾ
03/19/2020 2:00:48 PM
ਸਿਡਨੀ, (ਸਨੀ ਚਾਂਦਪੁਰੀ)— ਕੋਰੋਨਾ ਵਾਇਰਸ (#ਕੋਵਿਡ 19 ) ਨਾਲ ਪੂਰੀ ਦੁਨੀਆ ਹੀ ਗ੍ਰਸਤ ਹੋਈ ਪਈ ਹੈ। ਲੋਕ ਆਪਣੇ ਘਰਾਂ ਵਿੱਚ ਕੈਦ ਹੋ ਕੇ ਰਹਿ ਗਏ ਹਨ । ਕਈ ਦੇਸ਼ਾਂ ਨੇ ਏਅਰਲਾਈਨਜ਼ ਨੂੰ ਅੰਤਰਰਾਸ਼ਟਰੀ ਉਡਾਣਾਂ ਭਰਨ ਤੋਂ ਵੀ ਰੋਕ ਦਿੱਤਾ ਹੈ। ਜਿੱਥੇ ਸਾਰੀ ਦੁਨੀਆ ਇਸ ਕਹਿਰ ਤੋਂ ਡਰੀ ਹੋਈ ਹੈ, ਉੱਥੇ ਹੀ ਗੁਰੂ ਦੇ ਸਿੱਖਾਂ ਵੱਲੋ ਇਸ ਮੁਸ਼ਕਲ ਘੜੀ ਵਿੱਚ ਆਸਟ੍ਰੇਲੀਆ ਵਿੱਚ ਲੰਗਰ ਲਗਾ ਦਿੱਤੇ ਗਏ ਹਨ । ਆਸਟ੍ਰੇਲੀਆ ਵਿੱਚ ਜਿਹੜੇ ਲੋਕ ਰਾਸ਼ਨ ਦੇ ਸਟੋਰਾਂ ਵਿੱਚ ਜਾਣ ਤੋਂ ਅਸਮਰੱਥ ਹਨ, ਜਿਵੇਂ ਅਪਾਹਜ, ਬਜ਼ੁਰਗ ਅਤੇ ਬੀਮਾਰਾਂ ਨੂੰ ਸਿੱਖਾਂ ਵੱਲੋ ਉਨ੍ਹਾਂ ਦੇ ਘਰ ਵਿੱਚ ਹੀ ਰਾਸ਼ਨ ਅਤੇ ਭੋਜਨ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ ।
ਜ਼ਿਕਰਯੋਗ ਹੈ ਕਿ ਆਸਟ੍ਰੇਲੀਆ ਵਿੱਚ ਸੁਪਰਮਾਰਕਿਟਾਂ ਵਿੱਚ ਸਾਮਾਨ ਲੈਣ ਲਈ ਲੋਕਾਂ ਨੂੰ ਬਹੁਤ ਜੱਦੋ-ਜਹਿਦ ਕਰਨੀ ਪੈ ਰਹੀ ਹੈ। ਕੁਝ ਲੋਕ ਤਾਂ ਬਿਨਾ ਸਾਮਾਨ ਹੀ ਘਰ ਵਾਪਸ ਪਰਤ ਰਹੇ ਹਨ, ਜਿਸ ਨਾਲ ਉਨ੍ਹਾਂ ਨੂੰ ਰੋਜ਼ਾਨਾ ਦੀ ਵਰਤੋਂ ਵਾਲ਼ੀਆਂ ਵਸਤਾਂ ਵੀ ਨਹੀਂ ਮਿਲ ਰਹੀਆਂ, ਜਿਸ ਦੀ ਚਿੰਤਾ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਸਕੌਟ ਮੌਰੀਸਨ ਵੱਲੋਂ ਵੀਡੀਓ ਸੰਦੇਸ਼ ਜਾਰੀ ਕਰ ਕੇ ਕੀਤੀ ਗਈ ਸੀ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਸੀ ਕਿ ਲੋਕ ਸੁਪਰਮਾਰਕਿਟਾਂ 'ਤੇ ਮਦਦ ਵਾਲਾ ਵਿਵਹਾਰ ਵਰਤਣ ਅਤੇ ਇਕੋ ਵਾਰ ਇਕੱਠਾ ਰਾਸ਼ਨ ਨਾ ਲੈ ਜਾਣ ਤੇ ਹੋਰਾਂ ਦੀ ਵੀ ਵਾਰੀ ਆਉਣ ਦੇਣ। ਇਸ ਨਾਲ ਬਜ਼ੁਰਗਾਂ ਅਪਾਹਜਾਂ ਅਤੇ ਜੋ ਲੋਕ ਹਫ਼ਤੇ ਵਿੱਚ ਮਸਾਂ ਇੱਕ ਵਾਰ ਗਰੌਸਰੀ ਸਟੋਰਾਂ 'ਤੇ ਜਾ ਪਾਉਂਦੇ ਸਨ, ਨੂੰ ਵੀ ਘੰਟਿਆਂ ਤਕ ਸਾਮਾਨ ਲੈਣ ਲਈ ਮੁਸ਼ੱਕਤ ਕਰਨੀ ਪੈ ਰਹੀ ਹੈ।
ਇਸ ਨੂੰ ਦੇਖਦੇ ਹੋਏ ਸਿੱਖਾਂ ਵੱਲੋਂ ਇਹ ਲੰਗਰ ਲਗਾਏ ਗਏ ਹਨ, ਜਿਸ ਦੀ ਹਰ ਪਾਸੇ ਸਿਫਤ ਹੋ ਰਹੀ ਹੈ ।ਇਸ ਮੌਕੇ 'ਟਰਬਨ ਫੌਰ ਆਸਟ੍ਰੇਲੀਆ' ਦੇ ਮੈਂਬਰ ਅਮਰ ਸਿੰਘ ਨੇ ਦੱਸਿਆ ਕਿ ਸਾਨੂੰ ਗੁਰੂ ਵੱਲੋਂ ਹੀ ਇਹ ਸਿੱਖ ਦਿੱਤੀ ਗਈ ਹੈ ਕਿ ਜ਼ਰੂਰਤ ਲਈ ਹਮੇਸ਼ਾ ਤਤਪਰ ਰਹਿਣਾ ਚਾਹੀਦਾ ਹੈ ।
ਉਨ੍ਹਾਂ ਅੱਗੇ ਦੱਸਿਆ ਕਿ ਸਾਡੀ ਟੀਮ ਦੇ ਮੈਂਬਰਾਂ ਵੱਲੋਂ ਜ਼ਰੂਰਮੰਦ ਲੋਕਾਂ ਨੂੰ ਜੋ ਕਿ ਬਜ਼ੁਰਗ ਅਪਾਹਜ ਅਤੇ ਬੀਮਾਰ ਹਨ, ਨੂੰ ਸਾਡੇ ਵੱਲੋਂ ਖਾਣਾ ਅਤੇ ਰਸਦ ਮੁਫ਼ਤ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਸਾਡੀ ਟੀਮ ਦੁਪਹਿਰ ਤੋਂ ਖਾਣਾ ਬਣਾਉਣ ਵਿੱਚ ਜੁੱਟ ਜਾਂਦੀ ਹੈ ਅਤੇ ਸ਼ਾਮ ਦੇ 6 ਤੋਂ 9 ਵਜੇ ਤੱਕ ਲੰਗਰ ਅਤੇ ਰਸਦ ਲੋੜਵੰਦਾਂ ਨੂੰ ਮੁਹੱਈਆ ਕਰਵਾ ਰਹੀ ਹੈ । ਉਹ ਇਸ ਦੁੱਖ ਦੀ ਘੜੀ 'ਚ ਮਨੁੱਖਤਾ ਦੀ ਸੇਵਾ ਕਰ ਰਹੇ ਹਨ । ਇਸ ਮੌਕੇ ਉਨ੍ਹਾਂ ਨਾਲ ਅਮਰ ਸਿੰਘ, ਦਲਜੀਤ ਸਿੰਘ, ਸਤਬੀਰ ਸਿੰਘ, ਜਸਬੀਰ ਸਿੰਘ, ਜਗਦੀਸ਼ ਸਿੰਘ, ਮਨੋਹਰ ਸਿੰਘ ਅਤੇ ਰਮਨਦੀਪ ਸਿੰਘ ਵੀ ਮੌਜੂਦ ਸਨ ।