ਹਰ 'ਸਿਗਰਟ' 'ਤੇ ਹੋਵੇਗੀ ਸਿਹਤ ਸਬੰਧੀ ਚੇਤਾਵਨੀ, ਅਜਿਹਾ ਕਰਨ ਵਾਲਾ ਪਹਿਲਾ ਦੇਸ਼ ਬਣਿਆ ਕੈਨੇਡਾ
06/01/2023 1:35:08 PM
ਟੋਰਾਂਟੋ (ਏ.ਐੱਨ.ਆਈ.) ਕੈਨੇਡਾ ਆਪਣੇ ਦੇਸ਼ ਵਾਸੀਆਂ ਨੂੰ ਸਿਗਰਟਨੋਸ਼ੀ ਤੋਂ ਰੋਕਣ ਅਤੇ ਉਨ੍ਹਾਂ ਨੂੰ ਸਿਗਰਟ ਛੱਡਣ ਲਈ ਪ੍ਰੇਰਿਤ ਕਰਨ ਵੱਲ ਕਦਮ ਵਧਾ ਰਿਹਾ ਹੈ। ਕੈਨੇਡਾ ਨੇ ਹੁਣ ਤੰਬਾਕੂ ਨਾਲ ਹੋਣ ਵਾਲੀਆਂ ਮੌਤਾਂ ਨੂੰ ਘਟਾਉਣ ਦੀ ਕੋਸ਼ਿਸ਼ ਵਿੱਚ ਸਿਗਰੇਟਾਂ 'ਤੇ ਸਿੱਧੀ ਸਿਹਤ ਸਬੰਧੀ ਚੇਤਾਵਨੀ ਲੇਬਲ ਲਗਾਉਣ ਦਾ ਐਲਾਨ ਕੀਤਾ ਹੈ। ਇਹ ਜਾਣਕਾਰੀ ਕੈਨੇਡੀਅਨ ਮੀਡੀਆ ਦੀ ਇੱਕ ਰਿਪੋਰਟ ਵਿੱਚ ਦਿੱਤੀ ਗਈ।
ਕੈਨੇਡਾ ਵਿੱਚ ਸਿਗਰਟ 'ਤੇ ਦਿਸੇਗੀ ਚੇਤਾਵਨੀ
ਤੰਬਾਕੂ ਦਾ ਧੂੰਆਂ ਬੱਚਿਆਂ ਨੂੰ ਵੀ ਨੁਕਸਾਨ ਪਹੁੰਚਾਉਂਦਾ ਹੈ। ਸਿਗਰਟ ਲਿਊਕੀਮੀਆ ਦਾ ਕਾਰਨ ਬਣਦੀ ਹੈ। ਹਰ ਸੂਟੇ ਵਿੱਚ ਜ਼ਹਿਰ ਹੈ। ਕੁਝ ਅਜਿਹੇ ਸੰਦੇਸ਼ ਹਨ ਜੋ ਜਲਦੀ ਹੀ ਕੈਨੇਡਾ ਵਿੱਚ ਹਰ ਸਿਗਰਟ 'ਤੇ ਅੰਗਰੇਜ਼ੀ ਅਤੇ ਫਰੈਂਚ ਦੋਵਾਂ ਵਿੱਚ ਦਿਖਾਈ ਦੇਣਗੇ। ਹੁਣ ਹਰ ਸਿਗਰਟ 'ਤੇ ਸਿਹਤ ਸਬੰਧੀ ਚੇਤਾਵਨੀਆਂ ਛਾਪਣੀਆਂ ਪੈਣਗੀਆਂ। ਕੈਨੇਡਾ ਅਜਿਹਾ ਕਰਨ ਵਾਲਾ ਦੁਨੀਆ ਦਾ ਪਹਿਲਾ ਦੇਸ਼ ਬਣ ਗਿਆ ਹੈ। ਕੈਨੇਡੀਅਨ ਸਿਹਤ ਅਧਿਕਾਰੀਆਂ ਨੇ ਇੱਕ ਪ੍ਰੈਸ ਨੋਟ ਵਿੱਚ ਕਿਹਾ ਕਿ ਨਵੇਂ ਤੰਬਾਕੂ ਉਤਪਾਦਾਂ ਦੀ ਪੈਕਿੰਗ ਅਤੇ ਚੇਤਾਵਨੀ ਨਿਯਮਾਂ ਦਾ ਉਦੇਸ਼ ਕੈਨੇਡਾ ਸਰਕਾਰ ਨੂੰ ਉਹਨਾਂ ਬਾਲਗਾਂ ਦੀ ਮਦਦ ਕਰਨਾ ਹੈ ਜੋ ਸਿਗਰਟ ਛੱਡਣਾ ਚਾਹੁੰਦੇ ਹਨ।
ਮਿਸਾਲ ਕਾਇਮ ਕਰੇਗਾ ਇਹ ਨਿਯਮ
ਪੜ੍ਹੋ ਇਹ ਅਹਿਮ ਖ਼ਬਰ-ਕੈਨੇਡਾ ਜਾਣ ਦੇ ਚਾਹਵਾਨਾਂ ਲਈ ਖ਼ੁਸ਼ਖ਼ਬਰੀ, ਖੇਤੀਬਾੜੀ ਸਣੇ ਇਨ੍ਹਾਂ ਪੇਸ਼ੇਵਰਾਂ ਨੂੰ ਮਿਲਣਗੇ ਧੜਾ-ਧੜ ਵੀਜ਼ੇ
ਇਹ ਕਦਮ ਨੌਜਵਾਨਾਂ ਅਤੇ ਗੈਰ-ਤੰਬਾਕੂ ਉਪਭੋਗਤਾਵਾਂ ਨੂੰ ਨਿਕੋਟੀਨ ਦੀ ਲਤ ਤੋਂ ਬਚਾਉਣ ਅਤੇ ਤੰਬਾਕੂ ਦੀ ਅਪੀਲ ਨੂੰ ਹੋਰ ਘਟਾਉਣ ਵਿੱਚ ਵੀ ਮਦਦ ਕਰੇਗਾ। ਸਿਹਤ ਅਧਿਕਾਰੀਆਂ ਨੇ ਕਿਹਾ ਕਿ ਹਰ ਸਿਗਰਟ 'ਤੇ ਛਪੀਆਂ ਚੇਤਾਵਨੀਆਂ ਲੋਕਾਂ ਦਾ ਧਿਆਨ ਖਿੱਚਣਗੀਆਂ। ਕੈਨੇਡੀਅਨ ਕੈਂਸਰ ਸੋਸਾਇਟੀ ਦੇ ਸੀਨੀਅਰ ਨੀਤੀ ਵਿਸ਼ਲੇਸ਼ਕ ਰੌਬ ਕਨਿੰਘਮ ਅਨੁਸਾਰ ਨਵਾਂ ਨਿਯਮ ਇੱਕ ਵਿਸ਼ਵਵਿਆਪੀ ਮਿਸਾਲ ਕਾਇਮ ਕਰਨ ਲਈ ਇੱਕ ਮਹੱਤਵਪੂਰਨ ਕਦਮ ਹੋਵੇਗਾ, ਜੋ ਸਿਗਰਟਨੋਸ਼ੀ ਕਰਨ ਵਾਲੇ ਹਰ ਵਿਅਕਤੀ ਤੱਕ ਪਹੁੰਚ ਜਾਵੇਗਾ। ਇਹ ਨਿਯਮ 2035 ਤੱਕ ਦੇਸ਼ ਵਿਆਪੀ ਤੰਬਾਕੂ ਦੀ ਖਪਤ ਨੂੰ ਪੰਜ ਪ੍ਰਤੀਸ਼ਤ ਤੋਂ ਘੱਟ ਕਰਨ ਦੇ ਦੇਸ਼ ਦੇ ਟੀਚੇ ਦਾ ਹਿੱਸਾ ਹੈ।
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।