ਸ਼ਖਸ ਨੇ ਬੀਚ 'ਤੇ ਖਾਸ ਅੰਦਾਜ਼ 'ਚ ਪ੍ਰੇਮਿਕਾ ਨੂੰ ਕੀਤਾ ਪ੍ਰਪੋਜ਼, ਤਸਵੀਰਾਂ

ਲੰਡਨ (ਬਿਊਰੋ)— ਬ੍ਰਿਟੇਨ ਦੇ ਸਟੀਫਨ ਕਾਹਿਲ ਆਪਣੀ ਗਰਲਫਰੈਂਡ ਹੀਦੀ ਮੇਸਨ (Heidi Mason) ਨੂੰ ਖਾਸ ਅੰਦਾਜ਼ ਵਿਚ ਪ੍ਰਪੋਜ਼ ਕਰਨਾ ਚਾਹੁੰਦੇ ਸਨ। ਇਸ ਲਈ ਉਨ੍ਹਾਂ ਨੇ ਆਪਣੇ ਮਨਪਸੰਦ ਹੌਲੀਡੇ ਸਪੌਟ ਸੋਮਰਸੈੱਟ ਦੇ ਇਕ ਬੀਚ ਨੂੰ ਚੁਣਿਆ। ਇੱਥੇ ਇਕ ਸੈਂਡ ਆਰਟੀਸਟ ਸਿਮੋਨ ਬੇਕ ਦੀ ਮਦਦ ਨਾਲ ਬੀਚ 'ਤੇ 'ਵਿਲ ਯੂ ਮੈਰੀ ਮੀ' ਦਾ 85 ਮੀਟਰ ਚੌੜਾ ਸੈਂਡ ਆਰਟ ਤਿਆਰ ਕਰਵਾ ਕੇ ਸਟੀਫਨ ਨੇ ਆਪਣੇ ਦਿਲ ਦੀ ਗੱਲ ਹੀਦੀ ਨੂੰ ਕਹੀ। ਇਸ ਖਾਸ ਅੰਦਾਜ਼ ਵਿਚ ਆਪਣੇ ਪਿਆਰ ਦਾ ਇਜ਼ਹਾਰ ਕਰਦਿਆਂ ਉਨ੍ਹਾਂ ਨੇ ਇਸ ਦਿਨ ਨੂੰ ਯਾਦਗਾਰ ਬਣਾ ਲਿਆ।

ਬੀਚ 'ਤੇ ਸਟੀਫਨ ਗਰਲਫਰੈਂਡ ਹੀਦੀ ਦੀਆਂ ਅੱਖਾਂ ਬੰਦ ਕਰਵਾ ਕੇ ਅਜਿਹੀ ਜਗ੍ਹਾ ਲੈ ਗਏ ਜਿੱਥੋਂ ਦੀ ਉਹ ਉਨ੍ਹਾਂ ਦਾ ਪ੍ਰਪੋਜ਼ਲ ਸਿੱਧਾ ਦੇਖ ਸਕੇ। ਉੱਥੇ ਪਹੁੰਚ ਕੇ ਸਟੀਫਨ ਨੇ ਹੀਦੀ ਨੂੰ ਅੱਖਾਂ ਖੋਲ੍ਹਣ ਲਈ ਕਿਹਾ। ਜਿਵੇਂ ਹੀ ਹੀਦੀ ਨੇ ਅੱਖਾਂ ਖੋਲ੍ਹੀਆਂ ਉਸ ਦੇ ਸਾਹਮਣੇ ਬੀਚ 'ਤੇ 'Will you marry me' ਦਾ ਆਰਟ ਵਰਕ ਤਿਆਰ ਸੀ। ਇਸ ਤੋਂ ਪਹਿਲਾਂ ਹੀਦੀ ਕੁਝ ਕਹਿੰਦੀ ਸਟੀਫਨ ਹੱਥਾਂ ਵਿਚ ਮੁੰਦਰੀ ਫੜੀ ਗੋਡਿਆਂ ਭਾਰ ਬੈਠੇ ਹੋਏ ਸਨ। ਸਟੀਫਨ ਨੂੰ ਦੇਖਦੇ ਹੀ ਹੀਦੀ ਨੇ ਹਾਂ ਕਹੀ, ਫਿਰ ਸਟੀਫਨ ਨੇ ਉਸ ਨੂੰ ਮੁੰਦਰੀ ਪਾਈ।

ਇਸ ਆਰਟ ਵਰਕ ਜ਼ਰੀਏ ਪ੍ਰਪੋਜ਼ ਕਰਨ ਦੇ ਆਈਡੀਆ 'ਤੇ ਸਟੀਫਨ ਨੇ ਕਿਹਾ,''ਮੈਨੂੰ ਸ਼ੁਰੂ ਤੋਂ ਹੀ ਕੁਝ ਵੱਖਰਾ ਕਰਨਾ ਪਸੰਦ ਰਿਹਾ ਹੈ। ਇਸ ਲਈ ਹੀਦੀ ਨੂੰ ਪ੍ਰਪੋਜ਼ ਕਰਨ ਵੇਲੇ ਮੈਨੂੰ ਸੈਂਡ ਆਰਟ ਦਾ ਖਿਆਲ ਆਇਆ। ਮੈਂ ਸਿਮੋਨ ਨਾਲ ਸੋਸ਼ਲ ਮੀਡੀਆ ਜ਼ਰੀਏ ਮੈਸੇਜ ਕਰ ਕੇ ਸੰਪਰਕ ਕੀਤਾ। ਸਿਮੋਨ ਨੂੰ ਮੇਰਾ ਆਈਡੀਆ ਪਸੰਦ ਆਇਆ। ਆਰਟ ਵਰਕ ਤਿਆਰ ਕਰਨ ਵਿਚ ਸਿਮੋਨ ਨੂੰ ਪੂਰਾ ਦਿਨ ਲੱਗਾ। ਮੈਂ ਅਤੇ ਹੀਦੀ ਅਕਸਰ ਛੁੱਟੀਆਂ ਵਿਚ ਸੋਮਰਸੈੱਟ ਆਉਣ 'ਤੇ ਸਿਮੋਨ ਦੇ ਆਰਟ ਡਿਜ਼ਾਈਨ ਦੇਖਦੇ ਹੁੰਦੇ ਸੀ।''

ਸਟੀਫਨ ਨੇ ਅੱਗੇ ਦਸਿਆ,''ਹੀਦੀ ਨੂੰ ਤਾਂ ਪਤਾ ਵੀ ਨਹੀਂ ਸੀ ਕਿ ਮੈਂ ਇਸ ਵਾਰ ਦੀਆਂ ਛੁੱਟੀਆਂ ਲਈ ਕੀ ਯੋਜਨਾ ਬਣਾਈ ਹੈ। ਉਸ ਦਿਨ ਹੀਦੀ ਨੂੰ ਬੀਚ 'ਤੇ ਲਿਜਾਣ ਲਈ ਮੈਨੂੰ ਕਾਫੀ ਕੋਸ਼ਿਸ਼ਾਂ ਕਰਨੀਆਂ ਪਈਆਂ। ਜਿਵੇਂ ਹੀ ਉਸ ਨੇ ਆਰਟ ਵਰਕ ਵਾਲਾ ਮੈਸੇਜ ਦੇਖਿਆ ਉਹ ਕਾਫੀ ਭਾਵੁਕ ਹੋ ਗਈ। ਕੁਝ ਸਮੇਂ ਲਈ ਤਾਂ ਉਹ ਚੁੱਪ ਹੀ ਹੋ ਗਈ ਸੀ।''

ਸਟੀਫਨ ਮੁਤਾਬਕ,''ਹੀਦੀ ਨੇ ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਮੈਂ ਉਸ ਨੂੰ ਇਸ ਤਰੀਕੇ ਨਾਲ ਪ੍ਰਪੋਜ਼ ਕਰਾਂਗਾ। ਉਸ ਨੂੰ ਕੋਈ ਆਈਡੀਆ ਨਹੀਂ ਸੀ ਕਿ ਇਸ ਵਾਰ ਦਾ ਟ੍ਰਿਪ ਉਸ ਲਈ ਇੰਨਾ ਯਾਦਗਾਰ ਬਣ ਜਾਵੇਗਾ। ਇਹ ਪਲ ਸਾਡੇ ਦੋਹਾਂ ਲਈ ਬਹੁਤ ਖਾਸ ਸੀ। ਹੁਣ ਅਸੀਂ ਜਲਦੀ ਹੀ ਵਿਆਹ ਦੇ ਬੰਧਨ ਵਿਚ ਬੱਝ ਜਾਵਾਂਗੇ, ਜਿਸ ਲਈ ਅਸੀਂ ਤਿਆਰੀਆਂ ਵਿਚ ਜੁਟੇ ਹੋਏ ਹਾਂ।''