ਪਰਮਾਤਮਾ ਦੇ ਰੰਗ: ਅੱਤਵਾਦੀਆਂ 3 ਘੰਟੇ ਦੀ ਮਾਸੂਮ ਨੂੰ ਮਾਰੀਆਂ 2 ਗੋਲੀਆਂ, ਫਿਰ ਵੀ ਬਚ ਗਈ ਜਾਨ
05/16/2020 4:30:38 PM
ਕਾਬੁਲ- ਦੁਨੀਆ ਵਿਚ ਕੁਝ ਚਮਤਕਾਰ ਅਜਿਹੇ ਹੁੰਦੇ ਹਨ, ਜਿਸ ਦੇ ਬਾਰੇ ਸੁਣ ਕੇ ਪਰਮਾਤਮਾ 'ਤੇ ਵਿਸ਼ਵਾਸ ਹੋਰ ਪੱਕਾ ਹੋ ਜਾਂਦਾ ਹੈ। ਕੁਝ ਅਜਿਹਾ ਹੀ ਮਾਮਲਾ ਅਫਗਾਨਿਸਤਾਨ ਵਿਚ ਹੋਇਆ ਹੈ। ਇਥੇ ਅੱਤਵਾਦੀਆਂ ਨੇ ਇਕ ਨਵਜਾਤ ਬੱਚੀ ਨੂੰ ਦੋ ਵਾਰ ਗੋਲੀਆਂ ਮਾਰੀਆਂ ਪਰ ਸਿਰਫ ਤਿੰਨ ਘੰਟੇ ਪਹਿਲਾਂ ਪੈਦਾ ਹੋਈ ਬੱਚੀ ਫਿਰ ਵੀ ਬਚ ਗਈ। ਇਹ ਆਪਣੇ-ਆਪ ਵਿਚ ਇਕ ਅਨੋਖਾ ਮਾਮਲਾ ਹੈ।
ਇਕ ਪਾਸੇ ਅੱਤਵਾਦੀਆਂ ਦੀ ਬੇਰਹਿਮੀ ਕਿ ਉਹਨਾਂ ਨੇ 3 ਘੰਟੇ ਪਹਿਲਾਂ ਪੈਦਾ ਹੋਈ ਬੱਚੀ 'ਤੇ ਵੀ ਰਹਿਮ ਨਹੀਂ ਕੀਤਾ ਤੇ ਦੂਜੇ ਪਾਸੇ ਪਰਮਾਤਮਾ ਦਾ ਇਨਸਾਫ ਕਿ ਦੋ ਗੋਲੀਆਂ ਲੱਗਣ ਤੋਂ ਬਾਅਦ ਵੀ ਬੱਚੀ ਬਚ ਗਈ। ਡੇਲੀ ਮੇਲ ਦੀ ਰਿਪੋਰਟ ਮੁਤਾਬਕ ਅਫਗਾਨਿਸਤਾਨ ਵਿਚ ਕਾਬੁਲ ਦੇ ਮੈਟਰਨਿਟੀ ਹਸਪਤਾਲ ਵਿਚ ਕੁਝ ਅੱਤਵਾਦੀਆਂ ਨੇ ਹਮਲਾ ਕਰ ਦਿੱਤਾ ਸੀ। ਇਸ ਹਮਲੇ ਵਿਚ ਕੁੱਲ 24 ਲੋਕ ਮਾਰੇ ਗਏ। ਇਸ ਵਿਚ ਬੱਚਿਆਂ ਦੀਆਂ ਮਾਵਾਂ ਤੇ ਦੋ ਨਵਜਾਤ ਬੱਚੇ ਵੀ ਸ਼ਾਮਲ ਹਨ ਹਾਲਾਂਕਿ ਇਹ ਨਵਜਾਤ ਇਸ ਦੌਰਾਨ ਗੋਲੀਆਂ ਖਾ ਕੇ ਵੀ ਬਚ ਗਈ ਹਾਲਾਂਕਿ ਦੁਖ ਦੀ ਗੱਲ ਹੈ ਕਿ ਉਸ ਬੱਚੀ ਦੀ ਮਾਂ ਹਮਲੇ ਵਿਚ ਮਾਰੀ ਗਈ।
ਮੀਡੀਆ ਰਿਪੋਰਟਾਂ ਵਿਚ ਦੱਸਿਆ ਜਾ ਰਿਹਾ ਹੈ ਕਿ ਇਸਲਾਮਿਕ ਸਟੇਟ ਨਾਲ ਸਬੰਧ ਰੱਖਣ ਵਾਲੇ ਤਿੰਨ ਅੱਤਵਾਦੀਆਂ ਨੇ ਹਸਪਤਾਲ 'ਤੇ ਹਮਲਾ ਬੋਲਿਆ ਸੀ। ਕਾਬੁਲ ਦੇ ਮੈਟਰਨਿਟੀ ਹਸਪਤਾਲ ਵਿਚ ਦਾਖਲ ਹੁੰਦੇ ਹੀ ਅੱਤਵਾਦੀਆਂ ਨੇ ਬੰਬ ਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਅੱਤਵਾਦੀਆਂ ਨੇ ਪੁਲਸ ਫੋਰਸ ਦੀ ਵਰਦੀ ਪਾਈ ਹੋਈ ਸੀ। ਹੈਂਡ ਗ੍ਰੇਨੇਡ ਤੇ ਫਾਈਰਿੰਗ ਨਾਲ ਪੂਰਾ ਇਲਾਕਾ ਦਹਿਸ਼ਤ ਨਾਲ ਭਰ ਗਿਆ। ਚਾਰਾਂ ਪਾਸੇ ਚੀਕਾਂ-ਚਿਹਾੜਾ ਮਚ ਗਿਆ।
ਇਸ ਹਮਲੇ ਦੀ ਲਪੇਟ ਵਿਚ 3 ਘੰਟੇ ਦੀ ਇਕ ਬੱਚੀ ਵੀ ਆ ਗਈ। ਨਵਜਾਤ ਬੱਚੀ ਦੇ ਪੈਰ ਵਿਚ ਦੋ ਗੋਲੀਆਂ ਲੱਗੀਆਂ। ਬਾਅਦ ਵਿਚ ਸਾਰੇ ਅੱਤਵਾਦੀ ਵੀ ਢੇਰ ਕਰ ਦਿੱਤੇ ਗਏ। ਇਸ ਹਮਲੇ ਦੌਰਾਨ ਬੱਚੀ ਦਾ ਪੈਰ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਿਆ ਸੀ ਪਰ ਡਾਕਟਰਾਂ ਨੇ ਸਖਤ ਮਿਹਨਤ ਨਾਲ ਬੱਚੀ ਨੂੰ ਬਚਾ ਲਿਆ ਜਦਕਿ ਉਸ ਦੀ ਮਾਂ ਨਾਜ਼ੀਆ ਦੀ ਮੌਤ ਹੋ ਗਈ। ਇਸ ਸਾਰੀ ਘਟਨਾ ਤੋਂ ਬਾਅਦ ਦੁਖੀ ਪਿਤਾ ਰੈਫੁੱਲਾ ਨੇ ਆਪਣਾ ਬੱਚੀ ਨੂੰ ਉਸਦੀ ਮਾਂ ਦਾ ਹੀ ਨਾਂ ਨਾਜ਼ੀਆ ਹੀ ਦਿੱਤਾ ਹੈ।