ਕਿਰਗਿਸਤਾਨ 'ਚ ਦਿੱਸਿਆ ਭਿਆਨਕ ਮੰਜ਼ਰ, 'ਬਰਫ਼' 'ਚ ਜ਼ਿੰਦਾ ਦਫਨ ਹੁੰਦੇ ਬਚੇ ਬ੍ਰਿਟਿਸ਼ ਸੈਲਾਨੀ (ਵੀਡੀਓ)
07/11/2022 6:09:17 PM
ਬਿਸ਼ਕੇਕ (ਬਿਊਰੋ): ਕਿਰਗਿਸਤਾਨ ਦੇ ਤਿਆਨ ਸ਼ਾਨ ਪਹਾੜਾਂ ਵਿੱਚ ਬਰਫ਼ ਦਾ ਇਕ ਵੱਡਾ ਪਹਾੜ ਟੁੱਟਦਾ (Tian Shan Mountain Avalanche) ਦੇਖਿਆ ਗਿਆ। ਇਸ ਭਿਆਨਕ ਮੰਜ਼ਰ ਵਿੱਚ 9 ਬ੍ਰਿਟਿਸ਼ ਨਾਗਰਿਕਾਂ ਸਮੇਤ 10 ਲੋਕ ਫਸ ਗਏ ਸਨ। ਹਾਲਾਂਕਿ ਹਰ ਕੋਈ ਸੁਰੱਖਿਅਤ ਹੈ। ਇਹ ਸਾਰੇ ਟ੍ਰੈਕਿੰਗ ਯਾਤਰਾ ਲਈ ਗਏ ਸਨ। ਇਸ ਗਰੁੱਪ ਦੇ ਮੈਂਬਰ ਹੈਰੀ ਸ਼ਿਮਿਨ ਨੇ ਇੰਸਟਾਗ੍ਰਾਮ 'ਤੇ ਇਸ ਘਟਨਾ ਦਾ ਵੀਡੀਓ ਅਪਲੋਡ ਕੀਤਾ ਹੈ, ਜੋ ਰੂਹ ਨੂੰ ਕੰਬਾ ਦੇਣ ਵਾਲਾ ਹੈ। ਫੁਟੇਜ 'ਚ ਪਹਾੜ ਤੋਂ ਬਰਫ਼ ਡਿੱਗਦੀ ਅਤੇ ਅੱਗੇ ਵਧਦੀ ਦਿਖਾਈ ਦੇ ਰਹੀ ਹੈ। ਵੀਡੀਓ ਬਣਾ ਰਹੇ ਸ਼ਿਮਿਨ ਵੱਲ ਇਹ ਮੌਤ ਦੇ ਰੂਪ ਵਿੱਚ ਅੱਗੇ ਵੱਧ ਰਿਹਾ ਸੀ, ਪਰ ਇਸ ਦੌਰਾਨ ਉਹਨਾਂ ਨੇ ਆਪਣੇ ਆਪ ਨੂੰ ਢੱਕ ਲਿਆ।
ਬਰਫ਼ ਸ਼ਿਮਿਨ ਦੇ ਉੱਪਰੋਂ ਲੰਘ ਗਈ। ਵੀਡੀਓ ਪੋਸਟ ਕਰਨ ਦੇ ਨਾਲ ਹੀ ਸ਼ਿਮਿਨ ਨੇ ਲਿਖਿਆ,'ਮੈਂ ਆਪਣੇ ਪਿੱਛੇ ਬਰਫ਼ ਟੁੱਟਣ ਦੀ ਆਵਾਜ਼ ਸੁਣੀ। ਮੈਂ ਬਰਫ਼ ਦੀਆਂ ਤਸਵੀਰਾਂ ਲੈਣ ਲਈ ਗਰੁੱਪ ਤੋਂ ਦੂਰ ਹੋ ਗਿਆ। ਕਿਉਂਕਿ ਮੈਂ ਉੱਥੇ ਕੁਝ ਮਿੰਟ ਪਹਿਲਾਂ ਪਹੁੰਚ ਗਿਆ ਸੀ, ਮੈਨੂੰ ਪਤਾ ਸੀ ਕਿ ਪਨਾਹ ਕਿੱਥੇ ਲੈਣੀ ਹੈ। ਮੇਰੇ ਕੋਲ ਆਸਰਾ ਸੀ ਪਰ ਆਖਰੀ ਸਕਿੰਟ 'ਤੇ ਮੈਂ ਆਸਰਾ ਲੈਣ ਲਈ ਭੱਜਿਆ। ਮੈਂ ਜਾਣਦਾ ਸੀ ਕਿ ਇਸ ਸਮੇਂ ਦੌਰਾਨ ਆਸਰੇ ਵੱਲ ਭੱਜਣਾ ਇੱਕ ਜੋਖਮ ਭਰਿਆ ਕੰਮ ਸੀ। ਮੈਨੂੰ ਇਹ ਵੀ ਪਤਾ ਸੀ ਕਿ ਮੈਂ ਇੱਕ ਵੱਡਾ ਜੋਖਮ ਲਿਆ ਸੀ। ਜਦੋਂ ਲਗਾਤਾਰ ਬਰਫ਼ ਡਿੱਗਦੀ ਰਹੀ, ਤਾਂ ਮੇਰੇ ਚਾਰੇ ਪਾਸੇ ਹਨੇਰਾ ਸੀ, ਮੈਂ ਸੋਚਿਆ ਕਿ ਮੈਂ ਮਰ ਜਾਵਾਂਗਾ।
I suppose there was nowhere to run to, but still! 😳pic.twitter.com/3GE4M4YOxa
— James Withers (@scotfoodjames) July 10, 2022
ਬਰਫ਼ ਵਿੱਚ ਦੱਬਣ ਤੋਂ ਵਾਲ-ਵਾਲ ਬਚੇ
ਤਿਆਨ ਸ਼ਾਨ ਪਰਬਤ ਮੁੱਖ ਤੌਰ 'ਤੇ ਦੱਖਣ-ਪੂਰਬੀ ਕਿਰਗਿਸਤਾਨ ਤੋਂ ਸ਼ੁਰੂ ਹੋ ਕੇ ਚੀਨ ਦੀ ਉੱਤਰ-ਪੂਰਬੀ ਸਰਹੱਦ ਤੱਕ ਫੈਲਿਆ ਹੋਇਆ ਹੈ। ਸ਼ਿਮਿਨ ਨੇ ਅੱਗੇ ਕਿਹਾ ਕਿ ਉਹ ਜਾਣਦਾ ਸੀ ਕਿ ਉਸਦਾ ਬਾਕੀ ਸਮੂਹ ਨੇੜੇ ਸੀ ਇਸ ਲਈ ਉਹ ਸੁਰੱਖਿਅਤ ਰਹੇਗਾ, ਉਸਨੇ ਬਾਅਦ ਵਿੱਚ ਦੇਖਿਆ ਕਿ ਉਸਨੂੰ ਕੋਈ ਝਰੀਟਾਂ ਨਹੀਂ ਆਈਆਂ ਸਨ ਪਰ ਉਹ ਬਰਫ਼ ਦੇ ਪਾਊਡਰ ਨਾਲ ਢੱਕਿਆ ਹੋਇਆ ਸੀ। ਉਸ ਨੇ ਕਿਹਾ ਕਿ ਜਦੋਂ ਮੇਰੇ 'ਤੇ ਬਰਫ ਡਿੱਗੀ ਤਾਂ ਮੈਂ ਸਿਰਫ ਆਪਣੇ ਗਰੁੱਪ ਦੇ ਲੋਕਾਂ ਦੇ ਚੀਕਣ ਦੀ ਆਵਾਜ਼ ਸੁਣੀ।
ਇਸ ਗਰੁੱਪ ਵਿੱਚ ਇੱਕ ਅਮਰੀਕੀ ਕੁੜੀ ਵੀ ਸ਼ਾਮਲ ਸੀ, ਜਿਸ ਦੇ ਗੋਡੇ ਵਿੱਚ ਸੱਟ ਲੱਗੀ ਸੀ। ਉਸੇ ਸਮੇਂ ਇੱਕ ਆਦਮੀ ਘੋੜੇ ਤੋਂ ਡਿੱਗ ਕੇ ਜ਼ਖਮੀ ਹੋ ਗਿਆ। ਸ਼ਿਮਿਨ ਨੇ ਅੱਗੇ ਲਿਖਿਆ,'ਸਾਡਾ ਸਮੂਹ ਹੱਸ ਰਿਹਾ ਸੀ ਅਤੇ ਇਕੱਠੇ ਰੋ ਰਿਹਾ ਸੀ। ਅਸੀਂ ਜਿੰਦਾ ਬਚ ਕੇ ਖੁਸ਼ ਸੀ। ਬਾਅਦ ਵਿੱਚ ਸਾਨੂੰ ਅਹਿਸਾਸ ਹੋਇਆ ਕਿ ਅਸੀਂ ਬਹੁਤ ਖੁਸ਼ਕਿਸਮਤ ਸੀ। ਜੇਕਰ ਅਸੀਂ ਸਿਰਫ਼ ਪੰਜ ਮਿੰਟ ਹੋਰ ਆਪਣੀ ਯਾਤਰਾ ਜਾਰੀ ਰੱਖੀ ਹੁੰਦੀ, ਤਾਂ ਇਹ ਬਰਫ਼ ਸਾਡੇ 'ਤੇ ਡਿੱਗ ਜਾਂਦੀ। ਸਾਡੇ ਕੋਲ ਭੱਜਣ ਲਈ ਕੋਈ ਥਾਂ ਨਹੀਂ ਹੁੰਦੀ ਅਤੇ ਸਾਰੇ ਮਾਰੇ ਜਾਂਦੇ।