ਬਿਨਾਂ ਦਵਾਈਆਂ ਦੇ ਰਹੋ ਤੰਦਰੁਸਤ — 40 ਤੋਂ ਬਾਅਦ ਇਹ ਡਾਇਟ ਰੱਖੇਗੀ ਫਿਟ

ਹੈਲਥ ਡੈਸਕ- ਜਿਵੇਂ-ਜਿਵੇਂ ਉਮਰ 40 ਸਾਲ ਤੋਂ ਅੱਗੇ ਵਧਦੀ ਹੈ, ਸਰੀਰ 'ਚ ਪੋਸ਼ਣ ਦੀ ਕਮੀ ਹੋਣ ਲੱਗਦੀ ਹੈ, ਪਰ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਕਮੀ ਨੂੰ ਦਵਾਈਆਂ ਜਾਂ ਸਪਲੀਮੈਂਟਸ (supplements) ਨਾਲੋਂ ਵੱਧ ਸੰਤੁਲਿਤ ਖਾਣੇ ਰਾਹੀਂ ਪੂਰਾ ਕਰਨਾ ਚਾਹੀਦਾ ਹੈ। ਨਿਊਟ੍ਰੀਸ਼ਨਿਸਟ ਅਤੇ ਹੈਲਥ ਕੋਚ ਅਨੁਸਾਰ, ਅਸਲ ਪੋਸ਼ਣ ਖਾਣ-ਪੀਣ ਦੀਆਂ ਵਸਤੂਆਂ ਤੋਂ ਮਿਲਦਾ ਹੈ, ਕਿਉਂਕਿ ਭੋਜਨ ਦੇ ਨਾਲ-ਨਾਲ ਫਾਈਬਰ, ਹੈਲਦੀ ਫੈਟਸ, ਮਿਨਰਲਜ਼ ਅਤੇ ਪਲਾਂਟ ਕੰਪਾਊਂਡਸ ਵੀ ਮਿਲਦੇ ਹਨ। ਇਹ ਤੱਤ ਸਰੀਰ ਨੂੰ ਪੌਸ਼ਟਿਕ ਤੱਤਾਂ ਨੂੰ ਬਿਹਤਰ ਤਰੀਕੇ ਨਾਲ ਜਜ਼ਬ (absorb) ਕਰਨ 'ਚ ਮਦਦ ਕਰਦੇ ਹਨ ਅਤੇ ਮਾੜੇ ਪ੍ਰਭਾਵਾਂ (side effects) ਨੂੰ ਵੀ ਘੱਟ ਕਰਦੇ ਹਨ। ਮਾਹਿਰ ਦਾ ਕਹਿਣਾ ਹੈ ਕਿ 40 ਸਾਲ ਦੀ ਉਮਰ ਤੋਂ ਬਾਅਦ ਪੋਸ਼ਣ ਦੀ ਜ਼ਿਆਦਾਤਰ ਕਮੀ ਦਵਾਈਆਂ ਦੀ ਬਜਾਏ, ਤੁਹਾਡੀ ਥਾਲੀ 'ਚ ਸੰਤੁਲਨ ਦੀ ਕਮੀ ਕਾਰਨ ਸ਼ੁਰੂ ਹੁੰਦੀ ਹੈ।
40 ਤੋਂ ਬਾਅਦ ਜ਼ਰੂਰੀ ਪੋਸ਼ਣ ਭੋਜਨ ਤੋਂ ਕਿਵੇਂ ਲੈਣਾ ਹੈ:

ਮਾਹਿਰ ਨੇ ਕਈ ਜ਼ਰੂਰੀ ਪੌਸ਼ਟਿਕ ਤੱਤਾਂ ਦੀ ਪੂਰਤੀ ਲਈ ਸਿੱਧੇ ਭੋਜਨ ਸਰੋਤ ਦੱਸੇ ਹਨ, ਜਿਨ੍ਹਾਂ ਨੂੰ ਰੋਜ਼ਾਨਾ ਖੁਰਾਕ 'ਚ ਸ਼ਾਮਲ ਕਰਨਾ ਚਾਹੀਦਾ ਹੈ:

1. ਓਮੇਗਾ-3 ਲਈ ਅਲਸੀ:

ਇਕ ਵੱਡਾ ਚਮਚ ਅਲਸੀ (flaxseed) ਦਾ ਪਾਊਡਰ ਵਰਤਣ ਨਾਲ ਤੁਹਾਨੂੰ ਦਿਨ ਭਰ ਦੀ ਓਮੇਗਾ-3 ਦੀ ਲਗਭਗ 100 ਫੀਸਦੀ ਜ਼ਰੂਰਤ ਪੂਰੀ ਹੋ ਜਾਂਦੀ ਹੈ। ਇਸ ਨੂੰ ਦਹੀਂ, ਸਬਜ਼ੀ ਜਾਂ ਉਪਮਾ 'ਚ ਮਿਲਾ ਕੇ ਖਾਧਾ ਜਾ ਸਕਦਾ ਹੈ।

2. ਕੈਲਸ਼ੀਅਮ ਲਈ ਰਾਗੀ ਅਤੇ ਦਹੀਂ:

ਜੇਕਰ ਤੁਸੀਂ ਰੋਜ਼ਾਨਾ ਰਾਗੀ ਦੀਆਂ ਦੋ ਰੋਟੀਆਂ, 100 ਗ੍ਰਾਮ ਦਹੀਂ ਅਤੇ ਇਕ ਕਟੋਰੀ ਹਰੀ ਸਬਜ਼ੀ ਖਾਂਦੇ ਹੋ, ਤਾਂ ਤੁਹਾਡੀਆਂ ਦਿਨ ਭਰ ਦੀਆਂ ਕੈਲਸ਼ੀਅਮ ਦੀਆਂ 50 ਤੋਂ 60 ਫੀਸਦੀ ਜ਼ਰੂਰਤਾਂ ਪੂਰੀਆਂ ਹੋ ਜਾਂਦੀਆਂ ਹਨ।

3. ਆਇਰਨ ਲਈ ਹਲਿਮ/ਅਲੀਵ ਬੀਜ:

ਇਕ ਚਮਚ ਭਿੱਜੇ ਹੋਏ ਹਲਿਮ ਜਾਂ ਅਲੀਵ (ਜਿਨ੍ਹਾਂ ਨੂੰ ਗਾਰਡਨ ਕ੍ਰੇਸ ਸੀਡਜ਼ ਵੀ ਕਿਹਾ ਜਾਂਦਾ ਹੈ) ਖਾਣ ਨਾਲ ਰੋਜ਼ਾਨਾ ਆਇਰਨ ਦੀ ਜ਼ਰੂਰਤ ਦਾ ਲਗਭਗ 60 ਤੋਂ 70 ਫੀਸਦੀ ਪੂਰਾ ਹੋ ਜਾਂਦਾ ਹੈ। ਇਸ ਗੱਲ ਦਾ ਖਾਸ ਧਿਆਨ ਰੱਖੋ ਕਿ ਇਨ੍ਹਾਂ ਦਾ ਸੇਵਨ ਕਦੇ ਵੀ ਚਾਹ ਦੇ ਨਾਲ ਨਾ ਕਰੋ।

4. ਮੈਗਨੀਸ਼ੀਅਮ ਲਈ ਦਾਲ-ਰਾਜਮਾ ਅਤੇ ਕੱਦੂ ਦੇ ਬੀਜ:

ਇਕ ਕਟੋਰੀ ਦਾਲ ਜਾਂ ਰਾਜਮਾ ਦੇ ਨਾਲ 2 ਵੱਡੇ ਚਮਚ ਕੱਦੂ ਦੇ ਬੀਜ ਖਾਣ ਨਾਲ ਤੁਹਾਡੀ ਦਿਨ ਭਰ ਦੀ ਮੈਗਨੀਸ਼ੀਅਮ ਦੀ 50 ਫੀਸਦੀ ਜ਼ਰੂਰਤ ਪੂਰੀ ਹੁੰਦੀ ਹੈ।

5. ਵਿਟਾਮਿਨ ਏ ਲਈ ਪਾਲਕ:

ਸਿਰਫ਼ ਇਕ ਕਟੋਰੀ ਪਾਲਕ (spinach) ਖਾਣ ਨਾਲ ਤੁਹਾਨੂੰ ਦਿਨ ਭਰ ਦਾ ਲਗਭਗ 100 ਫੀਸਦੀ  ਵਿਟਾਮਿਨ ਏ ਮਿਲ ਸਕਦਾ ਹੈ। ਸਿਹਤ ਲਈ ਪਾਲਕ ਖਾਣ ਦੇ ਕਈ ਫਾਇਦੇ ਹੁੰਦੇ ਹਨ। ਇਸ ਲਈ ਸਿਹਤ ਮਾਹਿਰਾਂ ਦੀ ਸਲਾਹ ਹੈ ਕਿ ਬਿਨਾਂ ਲੋੜ ਤੋਂ ਵਿਟਾਮਿਨ ਦੀਆਂ ਦਵਾਈਆਂ ਖਾਣ ਦੀ ਬਜਾਏ, ਆਪਣੀ ਰੋਜ਼ਾਨਾ ਖੁਰਾਕ 'ਚ ਇਹ ਸਿਹਤਮੰਦ ਭੋਜਨ ਸ਼ਾਮਲ ਕਰਕੇ 40 ਸਾਲ ਤੋਂ ਬਾਅਦ ਜ਼ਰੂਰੀ ਪੋਸ਼ਣ ਪ੍ਰਾਪਤ ਕਰੋ।

ਨੋਟ– ਇਹ ਆਰਟੀਕਲ ਸਿਰਫ਼ ਆਮ ਜਾਣਕਾਰੀ ਲਈ ਹੈ। ਆਪਣੀ ਖੁਰਾਕ ਵਿੱਚ ਕੋਈ ਬਦਲਾਅ ਕਰਨ, ਕਿਸੇ ਵੀ ਬਿਮਾਰੀ ਨਾਲ ਸਬੰਧਤ ਕੋਈ ਵੀ ਉਪਾਅ ਕਰਨ ਜਾਂ ਕੋਈ ਵੀ ਘਰੇਲੂ ਨੁਸਖਾ ਅਪਣਾਉਣ ਤੋਂ ਪਹਿਲਾਂ ਆਪਣੇ ਡਾਕਟਰ ਦੀ ਸਲਾਹ ਜ਼ਰੂਰ ਲਓ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8