ਸਿੱਧੂ ਮੂਸੇ ਵਾਲਾ ਦੇ ਜਨਮਦਿਨ ’ਤੇ ਭਾਵੁਕ ਹੋਇਆ ਸੁੱਖ ਸੰਘੇੜਾ, ਲਿਖਿਆ– ‘ਤੂਫਾਨ ਵਾਂਗੂ ਆਇਆ ਆਪਣਾ ਕੰਮ ਕੀਤਾ ਤੇ...’

ਚੰਡੀਗੜ੍ਹ (ਬਿਊਰੋ)– ਸਿੱਧੂ ਮੂਸੇ ਵਾਲਾ ਦੇ ਜਨਮਦਿਨ ਮੌਕੇ ਅੱਜ ਹਰ ਆਮ ਤੋਂ ਲੈ ਕੇ ਖ਼ਾਸ ਵਿਅਕਤੀ ਨੂੰ ਭਾਵੁਕ ਹੁੰਦੇ ਦੇਖਿਆ ਜਾ ਰਿਹਾ ਹੈ। ਸਿੱਧੂ ਦਾ 28 ਸਾਲ ਦੀ ਉਮਰ ’ਚ ਦੁਨੀਆ ਤੋਂ ਚਲੇ ਜਾਣਾ ਸਭ ਨੂੰ ਡੂੰਘਾ ਦੁੱਖ ਦੇ ਗਿਆ। ਪੰਜਾਬੀ ਵੀਡੀਓ ਡਾਇਰੈਕਟਰ ਸੁੱਖ ਸੰਘੇੜਾ ਨੇ ਸਿੱਧੂ ਨੂੰ ਜਨਮਦਿਨ ਮੌਕੇ ਯਾਦ ਕਰਦਿਆਂ ਇਕ ਖ਼ਾਸ ਪੋਸਟ ਸਾਂਝੀ ਕੀਤੀ ਹੈ। ਭਾਵੁਕ ਕਰਨ ਵਾਲੀ ਇਸ ਪੋਸਟ ’ਚ ਸੁੱਖ ਨੇ ਸਿੱਧੂ ਬਾਰੇ ਕੁਝ ਗੱਲਾਂ ਆਖੀਆਂ ਹਨ।

ਸੁੱਖ ਸੰਘੇੜਾ ਨੇ ਲਿਖਿਆ, ‘‘ਹੈਪੀ ਬਰਥਡੇ... ਤੇਰੇ ਬਾਰੇ ਸਾਰੀ ਦੁਨੀਆ ਨੂੰ ਪਤਾ ਸੀ ਪਰ ਤੇਰੇ ਦਿਲ ਦਾ ਸਿਰਫ ਉਨ੍ਹਾਂ ਨੂੰ ਪਤਾ ਸੀ ਜੋ ਤੈਨੂੰ ਮਿਲੇ ਆ। ਜੇ ਮੈਨੂੰ ਅੱਜ ਇੰਨੇ ਦਿਨਾਂ ਬਾਅਦ ਵੀ ਇਹ ਨਹੀਂ ਲੱਗ ਰਿਹਾ ਕਿ ਤੂੰ ਹੈ ਨਹੀਂ, ਯਕੀਨ ਨਹੀਂ ਹੋ ਰਿਹਾ ਤਾਂ ਇਸ ਦਾ ਮਤਲਬ ਤੂੰ ਕੁਝ ਖ਼ਾਸ ਸੀ। ਅਸੀਂ ਜ਼ਿੰਦਗੀ ਜਿਊਂਦੇ ਆ ਜਿਊਣ ਲਈ, ਤੂੰ ਜ਼ਿੰਦਗੀ ਜਿਊਂਦਾ ਸੀ ਮਰਨ ਲਈ।’’

ਇਹ ਖ਼ਬਰ ਵੀ ਪੜ੍ਹੋ : ਸਿੱਧੂ ਮੂਸੇ ਵਾਲਾ ਦੇ ਜਨਮਦਿਨ ਮੌਕੇ ਸਾਹਮਣੇ ਆਈ ਖ਼ਾਸ ਵੀਡੀਓ, ਬਚਪਨ ਦੀਆਂ ਖ਼ੂਬਸੂਰਤ ਯਾਦਾਂ ਹੋਈਆਂ ਤਾਜ਼ਾ

ਸੁੱਖ ਨੇ ਅੱਗੇ ਲਿਖਿਆ, ‘‘ਬਹੁਤ ਚਲਾਕੀ ਕਰ ਗਿਆ, ਸਾਰੀ ਜ਼ਿੰਦਗੀ ਛੇਤੀ-ਛੇਤੀ ਸਾਥੋਂ ਪਹਿਲਾਂ ਹੀ ਜੀਅ ਗਿਆ, ਸਾਨੂੰ ਪਿੱਛੇ ਛੱਡ ਗਿਆ। ਤੂਫ਼ਾਨ ਵਾਂਗੂ ਆਇਆ, ਆਪਣਾ ਕੰਮ ਕੀਤਾ ਤੇ ਚਲਾ ਗਿਆ, ਤੂੰ ਜ਼ਿੰਦਗੀ ਨੂੰ ਬਹੁਤ ਜਲਦੀ ਸਮਝ ਗਿਆ ਸੀ।’’

ਅਖੀਰ ’ਚ ਸੁੱਖ ਨੇ ਲਿਖਿਆ, ‘‘ਮੈਨੂੰ ਤਾਂ ਇੰਝ ਲੱਗਦਾ ਕਿ ਤੂੰ ਉਸ ਦਿਨ ਗਿਆ ਹੀ ਮੌਤ ਨੂੰ ਮਿਲਣ। ਸਭ ਕੁਝ ਪਤਾ ਹੋਣ ਦੇ ਬਾਵਜੂਦ ਬੇਫਿਕਰਾ ਘਰੋਂ ਗਿਆ। ਸੋਚਦਾ ਹੋਣਾ ਕਿ ਅੱਜ ਕਰਦੇ ਆ ਮੌਤ ਨਾਲ ਮੁਲਾਕਾਤਾਂ ਕਿਉਂਕਿ ਤੈਨੂੰ ਸਭ ਪਤਾ ਸੀ। ਅਮਰ ਸਿੱਧੂ ਮੂਸੇ ਵਾਲਾ। ਬੇਤੁੱਕੀਆਂ ਜਿਹੀਆਂ ਗੱਲਾਂ, ਸਿੱਧੂ ਮੂਸੇ ਵਾਲਾ।’’

ਇਸ ਪੋਸਟ ਨਾਲ ਸੁੱਖ ਸੰਘੇੜਾ ਨੇ ਸਿੱਧੂ ਮੂਸੇ ਵਾਲਾ ਦੀਆਂ ਕੁਝ ਖ਼ਾਸ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਹਨ, ਜੋ ਸਿੱਧੂ ਦੇ ਚਾਹੁਣ ਵਾਲਿਆਂ ਨੂੰ ਬੇਹੱਦ ਪਸੰਦ ਆ ਰਹੀਆਂ ਹਨ।

ਨੋਟ– ਸੁੱਖ ਸੰਘੇੜਾ ਦੀ ਇਸ ਪੋਸਟ ’ਤੇ ਆਪਣੀ ਰਾਏ ਕੁਮੈਂਟ ਕਰਕੇ ਜ਼ਰੂਰ ਸਾਂਝੀ ਕਰੋ।