ਮੋਰਿੰਡਾ : ਦੁਖੀ ਨੌਜਵਾਨਾਂ ਨੇ ਸੜਕ ਵਿਚਕਾਰ ਲਾਇਆ ਝੋਨਾ, ਕੀਤਾ ਰੋਸ ਦਾ ਪ੍ਰਗਟਾਵਾ
07/08/2020 2:07:08 PM
ਮੋਰਿੰਡਾ (ਅਰਨੋਲੀ) : ਅਨੇਕਾਂ ਸੜਕ ਹਾਦਸਿਆਂ 'ਚ ਦਰਜਨ ਦੇ ਕਰੀਬ ਲੋਕਾਂ ਦੀਆਂ ਜਾਨਾਂ ਲੈ ਚੁੱਕੀ ਅਤੇ ਇਲਾਕੇ 'ਚ ਖੂਨੀ ਸੜਕ ਵਜੋਂ ਜਾਣੀ ਜਾਂਦੀ ਮੋਰਿੰਡਾ ਕਾਈਨੋਰ ਰੋਡ ਦੀ ਖਸਤਾ ਹਾਲਤ ਤੋਂ ਤੰਗ ਲੋਕ ਤੰਗ ਆ ਚੁੱਕੇ ਹਨ। ਇਸ ਦੇ ਚੱਲਦਿਆਂ ਹੀ ਬੁੱਧਵਾਰ ਨੂੰ ਨੌਜਵਾਨਾਂ ਵੱਲੋਂ ਸੜਕ ਵਿਚਕਾਰ ਟੋਇਆ 'ਚ ਭਰੇ ਪਾਣੀ 'ਚ ਝੋਨਾ ਲਗਾ ਕੇ ਸਰਕਾਰ ਅਤੇ ਕੈਬਨਿਟ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵਿਰੁੱਧ ਰੋਸ ਦਾ ਪ੍ਰਗਟਾਵਾ ਕੀਤਾ ਗਿਆ।
ਦੱਸਣਯੋਗ ਹੈ ਕਿ ਇਸ ਸੜਕ 'ਤੇ ਕਰੀਬ 5 ਕਿੱਲੋਮੀਟਰ ਰੋਡ 'ਤੇ ਸਰਕਾਰ ਵੱਲੋਂ 70 ਲੱਖ ਦੀ ਲਾਗਤ ਨਾਲ 5-6 ਵਾਰ ਪੈਚ ਵਰਕ ਵੀ ਕਰਵਾਇਆ ਜਾ ਚੁੱਕਾ ਹੈ ਪਰ ਓਵਰਲੋਡ ਵਾਹਨਾਂ ਦੇ ਲਾਂਘੇ ਕਾਰਨ ਪੈਚ ਵਰਕ ਕਾਮਯਾਬ ਨਹੀਂ ਰਿਹਾ। ਕੈਬਨਿਟ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਮੰਗ 'ਤੇ ਲੋਕ ਨਿਰਮਾਣ ਮਹਿਕਮੇ ਵੱਲੋਂ ਇਸ ਸੜਕ ਲਈ 3 ਕਰੋੜ ਰੁਪਏ ਜਾਰੀ ਕਰਨ ਦੇ ਦਾਅਵੇ ਵੀ ਕੀਤੇ ਗਏ ਪਰ ਕਈ ਮਹੀਨੇ ਬੀਤਣ 'ਤੇ ਵੀ ਸੜਕ ਬਣਾਉਣ ਦਾ ਕੰਮ ਸੁਰੂ ਨਹੀ ਹੋ ਸਕਿਆ।
ਇਸ ਰੋਡ ਨੂੰ ਲੈ ਕੇ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਵੱਲੋਂ ਰੋਸ ਧਰਨੇ ਦੇ ਕੇ ਅਣਮਿੱਥੇ ਸਮੇਂ ਲਈ ਹੜਤਾਲ ਕਰਨ ਅਤੇ ਤਿੱਖੇ ਸੰਘਰਸ਼ ਦੀ ਚਿਤਾਵਨੀ ਵੀ ਦਿੱਤੀ ਗਈ ਹੈ। ਬੀਤੇ ਦਿਨ ਅਕਾਲੀ ਦਲ ਵੱਲੋਂ ਪੈਟਰੋਲ ਡੀਜ਼ਲ ਤੇ ਆਟਾ ਦਾਲ ਸਕੀਮ 'ਚ ਲੋਕਾਂ ਦੇ ਨਾਮ ਕੱਟੇ ਜਾਣ ਸਬੰਧੀ ਲਗਾਏ ਰੋਸ ਧਰਨੇ 'ਚ ਵੀ ਇਸੇ ਸੜਕ ਦਾ ਮੁੱਦਾ ਪ੍ਰਮੁੱਖ ਰਿਹਾ ਸੀ।