ਸਖ਼ਤ ਸਿਖਲਾਈ ਤੋਂ ਬਾਅਦ 327 ਬਹਾਦਰ ਜਵਾਨ CRPF ''ਚ ਸ਼ਾਮਲ
06/08/2022 8:12:16 PM
ਜਲੰਧਰ : ਕੇਂਦਰੀ ਰਿਜ਼ਰਵ ਪੁਲਸ ਬਲ (ਸੀ.ਆਰ.ਪੀ.ਐੱਫ.) ਦੇ 327 ਬਹਾਦਰ ਜਵਾਨ ਅੱਜ ਏ.ਟੀ.ਸੀ., ਗਰੁੱਪ ਸੈਂਟਰ ਸੀ.ਆਰ.ਪੀ.ਐੱਫ. ਜਲੰਧਰ ਤੋਂ 44 ਹਫ਼ਤਿਆਂ ਦੀ ਬਹੁ-ਅਨੁਸ਼ਾਸਨੀ ਸਖ਼ਤ ਸਿਖਲਾਈ ਤੋਂ ਬਾਅਦ ਪਾਸਆਊਟ ਹੋਏ। ਇਸ ਸਿਖਲਾਈ ਨੇ ਸੈਨਿਕਾਂ ਨੂੰ ਵੱਖ-ਵੱਖ ਹੁਨਰਾਂ 'ਚਨਿਪੁੰਨ ਬਣਾਇਆ ਹੈ ਤਾਂ ਜੋ ਉਨ੍ਹਾਂ ਨੂੰ ਦੇਸ਼ ਦੇ ਸਭ ਤੋਂ ਵੱਡੇ ਅਰਧ ਸੈਨਿਕ ਬਲ, ਸੀ.ਆਰ.ਪੀ.ਐੱਫ. ਦੇ ਮਾਨਸਿਕ ਅਤੇ ਸਰੀਰਕ ਤੌਰ 'ਤੇ ਮਜ਼ਬੂਤ ਯੋਧੇ ਬਣਾਇਆ ਜਾ ਸਕੇ। 44 ਹਫ਼ਤਿਆਂ ਦੀ ਸਖ਼ਤ ਸਿਖਲਾਈ ਨੇ ਉਨ੍ਹਾਂ ਨੂੰ ਅੰਦਰੂਨੀ ਸੁਰੱਖਿਆ ਦੀ ਜ਼ਿੰਮੇਵਾਰੀ ਲੈਣ ਅਤੇ ਤਾਇਨਾਤੀ ਦੇ ਵਿਭਿੰਨ ਖਿੱਤਿਆਂ ਵਿੱਚ ਫੋਰਸ ਦੇ ਮਿਸ਼ਨ ਨੂੰ ਪੂਰਾ ਕਰਨ ਦੇ ਯੋਗ ਬਣਾਇਆ ਹੈ।
ਇਹ ਵੀ ਪੜ੍ਹੋ : ਕੈਬਨਿਟ ਵੱਲੋਂ ਨਵੀਂ ਆਬਕਾਰੀ ਨੀਤੀ ਨੂੰ ਮਨਜ਼ੂਰੀ, ਪੰਜਾਬ 'ਚ ਸਸਤੀ ਹੋਈ ਸ਼ਰਾਬ (ਵੀਡੀਓ)
ਪ੍ਰਭਾਵਸ਼ਾਲੀ ਪਾਸਿੰਗ ਆਊਟ ਪਰੇਡ ਸਮਾਰੋਹ ਵਿੱਚ ਮੂਲਚੰਦ ਪਨਵਰ, ਆਈ.ਜੀ., ਐੱਨ.ਡਬਲਿਊ.ਐੱਸ., ਸੀ.ਆਰ.ਪੀ.ਐੱਫ., ਚੰਡੀਗੜ੍ਹ ਨੇ ਸਲਾਮੀ ਲਈ ਅਤੇ ਪਰੇਡ ਦਾ ਨਿਰੀਖਣ ਕੀਤਾ। ਹਰਜਿੰਦਰ ਸਿੰਘ, ਡੀ.ਆਈ.ਜੀ., ਜੀ.ਸੀ. ਜਲੰਧਰ ਨੇ ਆਪਣੇ ਸਵਾਗਤੀ ਭਾਸ਼ਣ ਵਿੱਚ ਮੁੱਖ ਮਹਿਮਾਨ ਤੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਸਿੱਖਿਆਰਥੀਆਂ ਦਾ ਰਿਪੋਰਟ ਕਾਰਡ ਅਤੇ ਅੰਦਰੂਨੀ ਸੁਰੱਖਿਆ ਨੂੰ ਬਣਾਈ ਰੱਖਣ ਵਿੱਚ ਸੀ.ਆਰ.ਪੀ.ਐੱਫ. ਦੀ ਭੂਮਿਕਾ ਪੜ੍ਹੀ। ਵੱਖ-ਵੱਖ ਅਨੁਸ਼ਾਸਨਾਂ ਵਿੱਚ ਮੱਲਾਂ ਮਾਰਨ ਵਾਲੇ ਸਿੱਖਿਆਰਥੀਆਂ ਨੂੰ ਮੂਲਚੰਦ ਪਨਵਰ, ਆਈ.ਜੀ. ਨੇ ਟਰਾਫੀਆਂ ਨਾਲ ਸਨਮਾਨਿਤ ਕੀਤਾ। ਸਾਰੇ ਖੇਤਰਾਂ ਵਿੱਚ ਉੱਤਮਤਾ ਲਈ 'ਆਲ ਰਾਊਂਡ ਬੈਸਟ ਟਰਾਫੀ' ਹਰਿਆਣਾ ਦੇ ਚਰਖੀਦਾਦਰੀ ਜ਼ਿਲ੍ਹੇ ਦੇ ਕਾਂਸਟੇਬਲ ਸੰਜੇ ਨੂੰ ਪ੍ਰਦਾਨ ਕੀਤੀ ਗਈ। ਕਾਂਸਟੇਬਲ ਰਵਿੰਦਰ ਵੈਸ਼ਨਵ ਨੇ ਡਰਿੱਲ ਵਿੱਚ, ਕਾਂਸਟੇਬਲ ਪਿੰਕੂ ਨੇ ਫਾਇਰਿੰਗ ਵਿੱਚ, ਕਾਂਸਟੇਬਲ ਸੰਜੇ ਨੇ ਬੀ.ਓ.ਏ.ਸੀ, ਕਾਂਸਟੇਬਲ ਅਸ਼ੀਸ਼ ਕੁਮਾਰ ਨੇ ਇੰਡੋਰ, ਕਾਂਸਟੇਬਲ ਵਿਜੇ ਕੁਮਾਰ ਚੌਧਰੀ ਨੇ ਆਊਟਡੋਰ ਵਿੱਚ ਟਰਾਫੀ ਪ੍ਰਾਪਤ ਕੀਤੀ।
ਇਹ ਵੀ ਪੜ੍ਹੋ : ਅੱਜ ਵੀ ਕੁੰਡੀ ਕੁਨੈਕਸ਼ਨ ਨਾਲ ਹੀ ਚੱਲ ਰਹੀਆਂ ਹਨ ਸਮਾਰਟ ਸਿਟੀ ਜਲੰਧਰ ਦੀਆਂ ਹਜ਼ਾਰਾਂ LED ਲਾਈਟਾਂ
ਨਵੇਂ ਪਾਸ ਆਊਟ ਹੋਏ ਕਾਂਸਟੇਬਲਾਂ ਨੂੰ ਸੰਬੋਧਨ ਕਰਦਿਆਂ ਮੂਲਚੰਦ ਪਨਵਰ, ਆਈ.ਜੀ., ਐੱਨ.ਡਬਲਿਊ.ਐੱਸ., ਸੀ.ਆਰ.ਪੀ.ਐੱਫ., ਚੰਡੀਗੜ੍ਹ ਨੇ ਉਨ੍ਹਾਂ ਨੂੰ ਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਸੀ.ਆਰ.ਪੀ.ਐੱਫ. ਪਰਿਵਾਰ ਵਿੱਚ ਸ਼ਾਮਲ ਹੋਣ 'ਤੇ ਵਧਾਈ ਦਿੱਤੀ, ਜਿਨ੍ਹਾਂ ਨੇ ਆਪਣੇ ਬੱਚਿਆਂ ਦੇ ਜੀਵਨ ਵਿੱਚ ਮਹੱਤਵਪੂਰਨ ਮੀਲ ਪੱਥਰ ਨੂੰ ਦੇਖਿਆ। ਉਨ੍ਹਾਂ ਭਾਰਤ ਦੇ ਸੰਵਿਧਾਨ ਦੀ ਅਸਲ ਭਾਵਨਾ ਨੂੰ ਕਾਇਮ ਰੱਖਣ ਲਈ ਨਿਰਸਵਾਰਥ ਹੋ ਕੇ ਕੰਮ ਕਰਨ ਦਾ ਸੱਦਾ ਦਿੱਤਾ। ਇਸ ਮੌਕੇ 'ਤੇ ਨਵੇਂ ਪਾਸ ਆਊਟ ਬਹਾਦਰ ਜਵਾਨਾਂ ਨੇ ਨਿਹੱਥੇ ਲੜਾਈ, ਸਿੰਕ੍ਰੋਨਾਈਜ਼ਡ ਡਰਿੱਲ ਅਤੇ ਮਾਰਸ਼ਲ ਆਰਟਸ ਦੇ ਆਪਣੇ ਪ੍ਰਦਰਸ਼ਨਾਂ ਨਾਲ ਦਰਸ਼ਕਾਂ ਨੂੰ ਰੋਮਾਂਚਿਤ ਕੀਤਾ। ਪਾਸਿੰਗ ਆਊਟ ਪਰੇਡ ਵਿੱਚ ਸੇਵਾ ਅਧੀਨ/ਸੇਵਾ ਮੁਕਤ ਅਧਿਕਾਰੀਆਂ, ਹੋਰ ਵਿਸ਼ੇਸ਼ ਮਹਿਮਾਨਾਂ ਅਤੇ ਨਵੇਂ ਪਾਸ ਆਊਟ ਹੋਏ ਕਾਂਸਟੇਬਲਾਂ ਦੇ ਪਰਿਵਾਰਾਂ ਨੇ ਸ਼ਿਰਕਤ ਕੀਤੀ। ਇਸ ਤੋਂ ਬਾਅਦ ਮੁੱਖ ਮਹਿਮਾਨ ਅਤੇ ਮੇਜ਼ਬਾਨਾਂ ਨੇ ਮੌਕੇ ਦੀ ਭਾਵਨਾ ਨਾਲ ਜਸ਼ਨ ਅਨੁਸਾਰ ਹਾਈ-ਟੀ ਦੌਰਾਨ ਫੋਰਸ ਦੇ ਨਵੇਂ ਮੈਂਬਰਾਂ ਅਤੇ ਉਨ੍ਹਾਂ ਦੇ ਮਾਪਿਆਂ ਨਾਲ ਗੱਲਬਾਤਕੀਤੀ।