IFC ਨੇ HDFC ਨੂੰ 25 ਕਰੋੜ ਡਾਲਰ ਦੀ ਵਿੱਤੀ ਸਹਾਇਤਾ ਦਿੱਤੀ
07/25/2021 2:01:45 PM
ਨਵੀਂ ਦਿੱਲੀ : ਵਿਸ਼ਵ ਬੈਂਕ ਸਮੂਹ ਦੀ ਇਕ ਨਿਜੀ ਖੇਤਰ ਦੀ ਨਿਵੇਸ਼ ਕਰਨ ਵਾਲੀ ਇਕਾਈ ਅੰਤਰ ਰਾਸ਼ਟਰੀ ਵਿੱਤ ਕਾਰਪੋਰੇਸ਼ਨ (ਆਈ. ਐੱਫ. ਸੀ.) ਨੇ ਦੇਸ਼ ਵਿਚ ਘੱਟ ਆਮਦਨੀ ਲੈਣ ਵਾਲੇ ਗਾਹਕਾਂ ਨੂੰ ਸਸਤੀ ਗ੍ਰੀਨ ਹਾਊਸਿੰਗ ਲੋਨ ਮੁਹੱਈਆ ਕਰਾਉਣ ਲਈ ਐਚ.ਡੀ.ਐਫ.ਸੀ. ਨੂੰ 25 ਕਰੋੜ ਡਾਲਰ (1,875 ਕਰੋੜ ਰੁਪਏ) ਦਾ ਫੰਡ ਮੁਹੱਈਆ ਕਰਵਾਇਆ ਹੈ। ਇੱਕ ਸੰਯੁਕਤ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇਹ ਨਵਾਂ ਨਿਵੇਸ਼ ਘੱਟ ਅਤੇ ਮੱਧ-ਆਮਦਨੀ ਵਾਲੇ ਗ੍ਰਾਹਕਾਂ ਨੂੰ ਆਪਣਾ ਘਰ ਖਰੀਦਣ ਦੇ ਯੋਗ ਬਣਾਏਗਾ । ਇਸ ਨਾਲ ਉਨ੍ਹਾਂ ਦੀ ਵਿੱਤ ਤੱਕ ਪਹੁੰਚ ਵਧੇਗੀ।
ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇਹ ਪਹਿਲ ‘ਘਰ ਸਾਰਿਆਂ ਲਈ’ ਸਰਕਾਰ ਦੇ ਟੀਚੇ ਦੇ ਅਨੁਸਾਰ ਹੈ। ਇਹ ਫੰਡਿੰਗ ਰੋਜ਼ਗਾਰ ਪੈਦਾ ਕਰਨ ਵਿਚ ਵੀ ਸਹਾਇਤਾ ਕਰੇਗੀ। ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਇਸ ਵਿੱਚ ਘੱਟੋ ਘੱਟ 25 ਪ੍ਰਤੀਸ਼ਤ ਕਰਜ਼ੇ ਸਸਤੇ ਮਕਾਨਾਂ ਲਈ ਰੱਖੇ ਗਏ ਹਨ, ਜੋ ਭਾਰਤ ਵਿੱਚ ਇਸ ਮਾਰਕੀਟ ਨੂੰ ਉਤਸ਼ਾਹਤ ਕਰਨਗੇ।
ਬਿਆਨ ਵਿਚ ਕਿਹਾ ਗਿਆ ਹੈ, “ਗ੍ਰੀਨ ਹਾਊਸਿੰਗ ਨੂੰ ਦੇਸ਼ ਵਿਚ ਲਗਜ਼ਰੀ ਬਾਜ਼ਾਰ ਮੰਨਿਆ ਜਾਂਦਾ ਹੈ ਪਰ ਇਸ ਦੇ ਜਲਵਾਯੂ ਲਾਭਾਂ ਦੇ ਮੱਦੇਨਜ਼ਰ, ਆਈ.ਐਫ.ਸੀ. ਇਸ ਧਾਰਨਾ ਨੂੰ ਚੁਣੌਤੀ ਦੇਣਾ ਚਾਹੁੰਦੀ ਹੈ ਅਤੇ ਕਿਫਾਇਤੀ ਗਰੀਨ ਹਾਊਸਿੰਗ ਸਹਾਇਤਾ ਪ੍ਰਦਾਨ ਕਰਨ ਲਈ ਐਚ.ਡੀ.ਐਫ.ਸੀ. ਨਾਲ ਭਾਈਵਾਲੀ ਚਾਹੁੰਦਾ ਹੈ।” ਐਚ.ਡੀ.ਐਫ.ਸੀ. ਲਿਮਟਿਡ ਦੇ ਮੈਨੇਜਿੰਗ ਡਾਇਰੈਕਟਰ ਰੇਨੂੰ ਸੂਦ ਕਰਨਾਦ ਨੇ ਕਿਹਾ ਕਿ ਇਹ ਸਾਂਝੇਦਾਰੀ ਸਾਡੀ ਪਹੁੰਚ ਨੂੰ ਹੋਰ ਵਧਾਏਗੀ।
ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।