ਚਿਦਾਂਬਰਮ ਦਾ ਮੋਦੀ ਸਰਕਾਰ ''ਤੇ ਨਿਸ਼ਾਨਾ, ਕਿਹਾ-ਦੇਸ ਦੀ ਅਰਥਵਿਵਸਥਾ ''ਸਹੀ'' ਹੱਥਾਂ ''ਚ ਨਹੀਂ

ਨਵੀਂ ਦਿੱਲੀ — ਕਾਂਗਰਸ ਨੇ ਐਤਵਾਰ ਨੂੰ ਭਾਰਤੀ ਜਨਤਾ ਪਾਰਟੀ(ਭਾਜਪਾ) ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ 'ਤੇ ਇਕ ਵਾਰ ਫਿਰ ਨਿਸ਼ਾਨਾ ਸਾਧਿਆ ਹੈ। ਪਾਰਟੀ ਦੇ ਸੀਨੀਅਰ ਨੇਤਾ ਅਤੇ ਸਾਬਕਾ ਕੇਂਦਰੀ ਮੰਤਰੀ ਪੀ. ਚਿਦਾਂਬਰਮ ਨੇ ਕਿਹਾ ਕਿ ਦੇਸ਼ ਦੀ ਅਰਥਵਿਵਸਥਾ 'ਸਹੀ' ਹੱਥਾਂ ਵਿਚ ਨਹੀਂ ਹੈ ਅਤੇ ਇਹ ਹੀ ਕਾਰਨ ਹੈ ਕਿ ਦੇਸ਼ ਦੇ ਵਧੀਆ ਅਰਥ ਸ਼ਾਸਤਰੀਆਂ ਨੇ ਸਰਕਾਰ ਨੂੰ ਮੱਧ ਵਿਚ ਹੀ ਛੱਡ ਦਿੱਤਾ ਹੈ।

ਜੀ.ਡੀ.ਪੀ. ਦਾ ਚੁੱਕਿਆ ਮੁੱਦਾ

ਚਿਦਾਂਬਰਮ ਨੇ ਪਾਰਟੀ ਹੈਡਕੁਆਰਟਰ 'ਚ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਜੁਆਇੰਟ ਪ੍ਰਗਤੀਸ਼ੀਲ ਗਠਜੋੜ(ਯੂ.ਪੀ.ਏ.) ਦੀਆਂ ਦੋਵੇਂ ਸਰਕਾਰਾਂ ਅਤੇ ਕੌਮੀ ਜਮਹੂਰੀ ਗਠਜੋੜ ਦੀ ਪੁਰਾਣੀ ਅਤੇ ਮੌਜੂਦਾ ਸਰਕਾਰ ਦੇ ਕਾਰਜਕਾਲ 'ਚ ਆਰਥਿਕ ਵਿਕਾਸ ਦਰ(ਜੀ.ਡੀ.ਪੀ.) ਦੇ ਅੰਕੜਿਆਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਮੋਦੀ ਸਰਕਾਰ 'ਚ ਅਰਥਵਿਵਸਥਾ ਅਤੇ ਪ੍ਰਬੰਧਨ 'ਸਹੀ' ਹੱਥਾਂ ਵਿਚ ਨਹੀਂ ਹੈ। ਸਾਬਕਾ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਦੇ ਕਾਰਜਕਾਲ 'ਚ ਅਰਥ ਵਿਵਸਥਾ ਅਤੇ ਪ੍ਰਬੰਧਨ ਦੋਵੇਂ ਹੀ ਸਹੀ ਹੱਥਾਂ ਵਿਚ ਸਨ। ਉਨ੍ਹਾਂ ਨੇ ਕਿਹਾ ਕਿ ਦੇਸ਼ ਵਿਚ ਮਾਹਰ ਅਰਥਸ਼ਾਸਤਰੀਆਂ ਦੀ ਕੋਈ ਕਮੀ ਨਹੀਂ ਹੈ, ਪਰ ਇਹ ਸਰਕਾਰ ਉਨ੍ਹਾਂ ਨੂੰ ਲੱਭ ਨਹੀਂ ਸਕੀਂ।

ਟੈਕਸ ਅੱਤਵਾਦ ਦਾ ਸਾਹਮਣਾ ਕਰ ਰਹੇ ਲੋਕ

ਕਾਂਗਰਸ ਨੇਤਾ ਨੇ ਦੋਸ਼ ਲਗਾਇਆ ਕਿ ਮੋਦੀ ਸਰਕਾਰ ਦੀ ਅਗਵਾਈ 'ਚ ਨੋਟਬੰਦੀ ਅਤੇ ਨੁਕਸਦਾਰ ਵਸਤੂ ਅਤੇ ਸੇਵਾ ਕਰ(ਜੀ.ਐੱਸ.ਟੀ.) ਲਾਗੂ ਕੀਤੇ ਜਾਣ ਕਾਰਨ ਲੋਕ ਟੈਕਸ ਅੱਤਵਾਦ ਦਾ ਸਾਹਮਣਾ ਕਰ ਰਹੇ ਹਨ। ਉਨ੍ਹਾਂ ਨੇ ਟੈਕਸ ਅੱਤਵਾਦ ਨੂੰ ਪਰਭਾਸ਼ਤ ਕਰਦੇ ਹੋਏ ਕਿਹਾ ਕਿ ਜੀ.ਐੱਸ.ਟੀ. ਦੀਆਂ ਕਮੀਆਂ ਕਾਰਨ ਇਕ ਵਿਅਕਤੀ ਨੂੰ ਮਹੀਨੇ 'ਚ ਤਿੰਨ-ਤਿੰਨ ਅਤੇ ਸਾਲ 'ਚ 37 ਟੈਕਸ ਰਿਟਰਨ ਭਰਨੀਆਂ ਪੈਂਦੀਆਂ ਹਨ। ਜੇਕਰ ਕਿਸੇ ਦਾ ਕਾਰੋਬਾਰ ਦੇਸ਼ ਦੇ ਹੋਰ ਹਿੱਸਿਆਂ ਵਿਚ ਵੀ ਹੈ ਤਾਂ ਇਸ ਰਿਟਰਨ ਦੀ ਸੰਖਿਆ ਸੈਕੜਿਆਂ ਤੱਕ ਪਹੁੰਚ ਜਾਂਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹ ਅੱਤਵਾਦ ਨਹੀਂ ਤਾਂ ਕੀ ਹੈ?

ਦੇਸ਼ ਵਿਚ ਤਿੰਨ ਵਿੱਤ ਮੰਤਰੀ

ਚਿਦਾਂਬਰਮ ਨੇ ਕਿਹਾ ਕਿ ਜੀ.ਡੀ.ਪੀ. ਦੀ ਪੁਰਾਣੀ ਗਣਨਾ ਵਿਧੀ ਨੇ ਸਾਬਤ ਕਰ ਦਿੱਤਾ ਹੈ ਕਿ ਆਰਥਿਕ ਵਾਧੇ ਦੇ ਸਭ ਤੋਂ ਵਧੀਆ ਸਾਲ '2004-14' ਸਨ। ਉਨ੍ਹਾਂ ਨੇ ਕੇਂਦਰੀ ਅੰਕੜਾ ਮੰਤਰਾਲੇ ਵਲੋਂ ਜਾਰੀ ਅੰਕੜਿਆਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਜੀ.ਡੀ.ਪੀ. ਗਣਨਾ ਦੇ ਪੁਰਾਣੇ ਢੰਗ ਨੇ ਸਾਬਤ ਕਰ ਦਿੱਤਾ ਹੈ ਕਿ ਆਰਥਿਕ ਵਾਧੇ ਦੇ ਵਧੀਆ ਸਾਲ ਯੂ.ਪੀ.ਏ. ਸਰਕਾਰ  ਦੇ ਸਮੇਂ ਸਨ। ਇਕ ਸਵਾਲ ਜੇ ਜਵਾਬ 'ਚ ਸਾਬਕਾ ਕੇਂਦਰੀ ਵਿੱਤ ਮੰਤਰੀ ਨੇ ਕਿਹਾ ਕਿ ਦੇਸ਼ 'ਚ ਤਿੰਨ ਵਿੱਤ ਮੰਤਰੀ ਹਨ- ਡਿਫੈਕਟੋ(ਅਸਲੀ), ਡਿਜੁਰੇ(ਕਾਨੂੰਨੀ) ਅਤੇ ਅਦਿੱਖ। ਉਨ੍ਹਾਂ ਦਾ ਇਸ਼ਾਰਾ ਕ੍ਰਮਵਾਰ ਅਰੁਣ ਜੇਤਲੀ, ਪੀਯੁਸ਼ ਗੋਇਲ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲ ਸੀ।