“ਡਰਪੋਕ ਅਹਿਸਾਸ''''
07/12/2017 5:18:08 PM
ਗਈ ਰਾਤ ਤੱਕ
ਤੇਰੇ ਬਾਰੇ ਸੋਚਦਾਂ !
ਜੋ ਸੋਚਿਆ ਹੁੰਦੈ
ਕਹਿ ਨਾ ਹੋਵੇ
ਤੈਨੂੰ ਮਿਲਣ ਤੇ
ਨਜ਼ਰਾਂ ਝੁਕਾ ਲੈਨਾਂ ਹਾਂ ,
ਤੇਰੇ ਕੋਲ ਆਉਦਿਆਂ
ਸਾਰੇ ਸ਼ਬਦ ਬਜ਼ਰਾਅ ਜਾਂਦੇ ਨੇ
ਦਿਲ ਦਾ ਹਰ ਖਿਆਲ
ਰੂਹ ਦਾ ਹਰ ਵਲਵਲਾ
ਡਰਦਿਆਂ ਅੰਦਰ ਹੀ ਦੁਬਕ ਕਿ
ਕਕੂਨ ਵਿੱਚ ਬੰਦ ਹੋ ਜਾਂਦਾ ਹੈ !
ਕਿੰਨ੍ਹਾ ਕੁੱਝ ਸੋਚਿਆ ਹੁੰਦੈ
ਕਿੰਨ੍ਹਾ ਕੁੱਝ ਲੋਚਿਆ ਹੁੰਦੈ
ਐਪਰ ਸਭ ਕੁੱਝ
ਦੂਰ ਚਲਾ ਜਾਦੈ
. . . ਵਿਸਰ ਜਾਦੈ
ਤੇਰੇ ਸਾਹਵੇਂ ਆਉਣ 'ਤੇ
•
ਕੁੱਕੜ ਦੀ ਬਾਂਗ ਤੋਂ
ਪਹਿਲਾਂ ਦੇ ਪਹਿਰ
ਸੁਪਨੇ ਵਿੱਚ
ਤੇਰੇ ਨਾਲ
ਗੱਲ੍ਹਾਂ ਕਰਦਾ ਰਿਹਾ
ਤੇਰੇ ਮੱਥੇ ਨੂੰ
ਚੁੰਮਿਆ ਹੀ ਸੀ
ਕਿ . . .
ਤੂੰ ਤ੍ਰਬਕੀ
ਤੇ ਮੇਰੀ ਅੱਖ ਖੁੱਲ੍ਹ ਗਈ।
ਸੁਲਗਦੇ ਅਹਿਸਾਸਾਂ ਨੂੰ
ਤ੍ਰਬਕਦੇ ਸ਼ਬਦਾਂ ਦਾ
ਜਾਮਾ ਪਹਿਣਾਅ
ਕਾਗਜ਼ ਦੀ ਹਿੱਕ 'ਤੇ
ਉਕਰਿਆ ਹੈ
“ਤੂੰ ਪੜ੍ਹੀ . . .“
. . . ਕਿਉ ਜੋ ,
ਮੈਂ ਦੇਖਣਾਂ ਚਾਹੁੰਦਾ ਹਾਂ
ਕੋਈ ਡਰਪੋਕ ਅਰਮਾਂ
ਤੇਰੇ ਵੀ ਸੀਨੇ
ਧੜਕਦਾ ਹੈ . . .
. . . ਜਾਂ ਨਹੀ ?