ਜਨਮ ਤੋਂ ਸੁਣ ਨਹੀਂ ਸਕਦੀ ਸੀ ਬੱਚੀ, ਮਾਂ ਨੇ ਫੇਸਬੁੱਕ ''ਤੇ ਪੋਸਟ ਕੀਤੀ ਭਾਵੁਕ ਕਰ ਦੇਣ ਵਾਲੀ ਵੀਡੀਓ

ਵਾਸ਼ਿੰਗਟਨ (ਬਿਊਰੋ)— ਅਕਸਰ ਸੋਸ਼ਲ ਮੀਡੀਆ 'ਤੇ ਬੱਚਿਆਂ ਦੀਆਂ ਅਜਿਹੀ ਵੀਡੀਓਜ਼ ਪੋਸਟ ਕੀਤੀਆਂ ਜਾਂਦੀਆਂ ਹਨ, ਜਿਨ੍ਹਾਂ ਨੂੰ ਦੇਖ ਕਈ ਵਾਰ ਹਾਸਾ ਵੀ ਆਉਂਦਾ ਹੈ ਅਤੇ ਕੋਈ ਵੀਡੀਓ ਭਾਵੁਕ ਕਰ ਦੇਣ ਵਾਲੀ ਵੀ ਹੁੰਦੀ ਹੈ। ਇਨ੍ਹੀਂ ਦਿਨੀਂ ਸੋਸ਼ਲ ਮੀਡੀਆ 'ਤੇ ਇਕ ਮਾਂ ਨੇ ਇਕ ਅਜਿਹੀ ਹੀ ਭਾਵੁਕ ਕਰ ਦੇਣ ਵਾਲੀ ਵੀਡੀਓ ਪੋਸਟ ਕੀਤੀ ਹੈ, ਜਿਸ ਨੂੰ ਦੇਖ ਕੇ ਤੁਸੀਂ ਵੀ ਜ਼ਰੂਰ ਭਾਵੁਕ ਹੋ ਜਾਓਗੇ।
ਵੀਡੀਓ 'ਚ ਜੋ ਬੱਚੀ ਤੁਸੀਂ ਦੇਖ ਰਹੇ ਹੋ, ਉਸ ਦੇ ਜਨਮ ਤੋਂ ਹੀ ਕੰਨ ਕੰਮ ਨਹੀਂ ਕਰਦੇ ਸਨ। ਬੱਚੀ ਪਹਿਲੀ ਵਾਰ ਆਪਣੀ ਮਾਂ ਦੀ ਪਿਆਰ ਭਰੀ ਆਵਾਜ਼ ਸੁਣ ਕੇ ਭਾਵੁਕ ਹੋ ਗਈ। ਕਿਸੇ ਵੀ ਮਾਂ ਲਈ ਉਹ ਪਲ ਬੇਹੱਦ ਹੀ ਖਾਸ ਹੁੰਦੇ ਹਨ, ਜਦੋਂ ਉਨ੍ਹਾਂ ਦਾ ਬੱਚਾ ਕੁਝ ਨਵਾਂ ਕਰਦਾ ਹੈ। ਅਜਿਹਾ ਹੀ ਕੁਝ ਖਾਸ ਪਲ ਦਾ ਅਨੁਭਵ ਦੋ ਮਹੀਨੇ ਦੀ ਚਾਰਲੀ ਕੀਨ ਅਤੇ ਉਸ ਦੀ ਮਾਂ ਕ੍ਰਿਸਟੀ ਨੇ ਕੀਤਾ ਹੈ। ਮਾਂ ਕ੍ਰਿਸਟੀ ਲਈ ਉਹ ਪਲ ਬਹੁਤ ਖਾਲ ਬਣ ਗਿਆ, ਜਦੋਂ ਚਾਰਲੀ ਨੇ ਪਹਿਲੀ ਵਾਰ ਉਸ ਦੀ ਆਵਾਜ਼ ਸੁਣੀ। ਬੱਚੀ ਨੇ ਦੋ ਮਹੀਨੇ ਬਿਨਾਂ ਕੋਈ ਆਵਾਜ਼ ਸੁਣੇ ਹੀ ਬਿਤਾ ਦਿੱਤੇ। ਜਦੋਂ ਚਾਰਲੀ ਦੇ ਮਾਤਾ-ਪਿਤਾ ਨੂੰ ਉਸ ਦੀ ਇਸ ਸਥਿਤੀ ਬਾਰੇ ਪਤਾ ਲੱਗਾ ਤਾਂ ਉਨ੍ਹਾਂ ਨੇ ਆਪਣੀ ਬੱਚੀ ਦੇ ਕੰਨਾਂ 'ਚ ਸੁਣਨ ਵਿਚ ਮਦਦ ਕਰਨ ਵਾਲੀ ਮਸ਼ੀਨ ਲਗਵਾਈ, ਉਸ ਤੋਂ ਬਾਅਦ ਪਹਿਲੀ ਵਾਰ ਚਾਰਲੀ ਨੇ ਆਪਣੇ ਮਾਤਾ-ਪਿਤਾ ਦੀ ਆਵਾਜ਼ ਸੁਣੀ।

ਚਾਰਲੀ ਦੀ ਮਾਂ ਕ੍ਰਿਸਟੀ ਨੇ ਫੇਸਬੁੱਕ 'ਤੇ ਇਸ ਭਾਵੁਕ ਕਰ ਦੇਣ ਵਾਲੇ ਪਲ ਦੀ ਵੀਡੀਓ ਅਪਲੋਡ ਕਰਦੇ ਹੋਏ ਲਿਖਿਆ, ''ਨੰਨ੍ਹੀ ਚਾਰਲੀ ਨੇ ਜਦੋਂ ਪਹਿਲੀ ਵਾਰ ਮੈਨੂੰ ਆਈ ਲਵ ਯੂ ਕਹਿੰਦੇ ਸੁਣਿਆ ਤਾਂ ਉਹ ਭਾਵੁਕ ਹੋ ਗਈ, ਉਸ ਦੀਆਂ ਅੱਖਾਂ ਵਿਚ ਹੰਝੂ ਆ ਗਏ।'' ਕ੍ਰਿਸਟੀ ਨੇ ਅੱਗੇ ਲਿਖਿਆ ਕਿ ਮੈਂ ਇਸ ਖਾਸ ਪਲ ਦੇ ਅਨੁਭਵ ਨੂੰ ਸ਼ਬਦਾਂ ਵਿਚ ਬਿਆਨ ਨਹੀਂ ਕਰ ਸਕਦੀ। ਸਾਡੀ ਥੋੜ੍ਹੀ ਜਿਹੀ ਮਦਦ ਮਿਲਣ ਤੋਂ ਬਾਅਦ ਚਾਰਲੀ ਨੇ ਮੇਰੀ ਆਵਾਜ਼ ਸੁਣੀ। ਉਹ ਪਲ ਚਮਤਕਾਰੀ ਸੀ।